«Nólinshi» synypty engizý nege bir jylǵa shegerildi - mınıstr jaýaby
ASTANA. QazAqparat - QR Bilim jáne ǵylym mınıstri Erlan Saǵadıev «nólinshi» synypty engizý júıesi nelikten 2020 jylǵa shegerilgenin túsindirdi, dep habarlaıdy «QazAqparat» HAA tilshisi.
«Baǵdarlamada ózgerister bar. Bizdiń alǵashqy josparymyzda «nólinshi» synypty engizý 2019 jylǵa josparlanǵan bolatyn. Búgingi tańda biryńǵaı baǵdarlama jáne muǵalimderdi daıyndaý kestesi daıyn. Oqýlyqtar saraptamadan ótti. Biraq, ol oqýlyqtardyń barlyǵy da kırıll qarpimen jazylǵan. Endi 400 myńǵa jýyq balaǵa nólinshi synyptyń jańa oqýlyqtaryn basyp shyǵarý kerek bolyp tur. Latyn qarpindegi qazaq álipbıine kóshýge baılanysty oqýlyqtardy birjola latynsha basqan durys dep esepteımiz. Bul qarjy jaǵynan da tıimdi bolady», - dedi mınıstr.
Erlan Saǵadıevtyń aıtýynsha, oqýlyqtardy daıyndap, saraptama men aprobatsııadan ótkizý, muǵalimderdi daıyndaý - barlyǵyna ýaqyt kerek.
«Sondyqtan, nólinshi synypqa 2020 jyly ótemiz. Sondaı ózgerister memlekettik baǵdarlamaǵa engizildi», - dedi ol.
Eske sala keteıik, Erlan Saǵadıev buǵan deıin Qazaqstanda «nólinshi» synyp 2020 jyly engiziletindigi týraly aıtqan bolatyn.
