Nokia kompanııasy daǵdarysty bastan keship, básekelesterine ese jiberýde - Nokia basshysy
ASTANA. 10 aqpan. QazAqparat - Uıaly telefon óndirýshilerdiń arasynda jetekshi oryn alatyn fındyq Nokia kompanııasy daǵdarysty bastan keshirýde, sebebi básekelesterine ilese almaı keledi.
Atap aıtqanda, qazirgi tańda Nokia sanatynda búgingi uıaly telefon naryǵynyń kóshbasshysy iPhone smartfonymen teń keletin ónim joq. Bul týraly Nokia basshysy Stıven Elop qyzmetkerlerge jazǵan hatynda málim etti, hattyń úzindisi brıtan BAQ-ynda jarııa etildi, dep habarlaıdy RBK.
«iPhone alǵashqy nusqasy 2007 jyly shyqqan bolatyn, al bizde áli mundaı ónim joq. Android (uıaly telefon platformasy) eki jyl buryn shyǵarylyp, keńinen tanymaldyqqa ıe boldy, al Nokia - Symbian operatıvtik júıesi paıdalanýshylardyń búgingi suranystaryn qanaǵattandyra almaı otyr», - deıdi S.Ellop óz hatynda.
S.Elloptyń aıtýynsha, kompanııanyń qazirgi jaǵdaıy ashyq teńizde janyp jatqan munaı platformasyna teń. Aman qalý úshin «teńizge sekirý» qajet, ıaǵnı batyl qadamdarǵa barý kerek.
