«Nokia» Fınlıandııadaǵy júzden astam qyzmetkerin jumystan shyǵarady
ASTANA. QazAqparat - Nokia kompanııasy frantsýzdyq-amerıkalyq Alcatel-Lucent-ti satyp alǵan soń, Fınlıandııadaǵy júzden astam qyzmetkerin qysqartatynyn habarlady, dep jazady RBK.
Fın kompanııasy shyǵyndardy qysqartý baǵdarlamasyn sáýir aıynda iske qosqan. Onyń maqsaty - 2018 jylǵa qaraı shyǵyndardy 900 mln. eýroǵa (1 mlrd. dollar) tómendetý. Kompanııa basqa elderdegi shyǵyndaryn qanshaǵa qysqartatynyn habarlaǵan joq, alaıda 30-ǵa jýyq eldegi qyzmetkerleriniń ókilderimen kelissózder júrgizip otyrǵanyn jetkizdi.
Jalpy alǵanda, Nokia kompanııasynyń álem boıynsha 104 myńǵa jýyq qyzmetkeri bar. Atap aıtqanda Fınlıandııada 6,8 myń adam, Germanııada - 4,8 myń adam jáne Frantsııada - 4,2 myń adam kompanııaǵa qyzmet etedi.
