Nóketaeva: Elbasy maqalasy - saıası reforma men ekonomıkalyq jańǵyrý úderisteriniń bastalǵanynyń kepili
Qazaq memlekettik qyzdar pedagogıkalyq ýnıversıtetiniń rektory, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Dınar Nóketaeva Elbasy maqalasyna oraı osyndaı pikir bildirdi.
«Elbasymyz maqalanyń kirispe sózinde bylaı deıdi: «Atalǵan eki jańǵyrý protsesiniń de naqty maqsat-mindetteri, basymdyqtary men oǵan jetkizetin joldary bar. Men kózdegen jumystarymyzdyń bári der ýaqytynda jáne barynsha tıimdi júzege asaryna senimdimin. Biraq, oılaǵanymyz oryndalý úshin munyń ózi jetkiliksiz. Maqsatqa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis. Bul saıası jáne ekonomıkalyq jańǵyrýlardy tolyqtyryp qana qoımaı, olardyń ózegine aınalady». Bul sózder saıası reforma men ekonomıkalyq jańǵyrý elimiz úshin qanshalyqty mańyzdy ekendigin kórsetetin jol», - deıdi ol.
Dınar Nóketaeva stýdent jastar Elbasynyń osy sózderin ózderiniń alǵa qoıǵan maqsattaryna kiriktire otyryp, Qazaqstan Respýblıkasynyń ıntellektýaldyq dárejesiniń joǵarlaýyna úlesin qosady degen senim bildirdi. Onyń aıtýynsha, jastardyń, ásirese stýdent jastardyń ıntellektýaldy kórsetkishteri olardyń tek bilim deńgeıimen ǵana ólshenbeıdi, sonymen qatar, olardyń rýhanı jańǵyrýymen de tikeleı baılanysty. Rýhanı jańǵyrý árbir jeke tulǵa úshin onyń tárbıesi, ulttyq sana-sezimi, ulttyq rýhanı tamyrynan nár alǵan qundylyqtary men onyń jahandyq ózgeristerdi durys boıyna sińirýi.
«Men ýnıversıtetimizdiń stýdent jastarynyń básekege qabiletti maman bolatyndyǵyna kámil senimdemin. Básekege qabiletti dep qazirgi qazaq qoǵamynda mádenı qundylyqtardy boıyna sińirgen, úsh tildi jetik bilýge umtylǵan jáne jańa ádister men tehnologııaǵa toleranttylyqty saqtaı alatyn tulǵalardy aıta alamyz. Osyndaı jeke qasıetter men qundylyqtardy boıyna sińirý úderisindegi bizdiń stýdent jastar elimizdiń básekege qabilettilik deńgeıin kóterýi tıis», - dedi ol.
Qazaq memlekettik qyzdar pedagogıkalyq ýnıversıtetiniń rektory Qazaqstan Respýblıkasynyń bolashaq baǵdary oń bolýy úshin Elbasymyz «pragmatızm» sózine kóńil bólýdi usynǵanyna erekshe toqtalyp ótti. Maqalada Elbasy «Pragmatızm - ózińniń ulttyq jáne jeke baılyǵyńdy naqty bilý, ony únemdi paıdalanyp, soǵan sáıkes bolashaǵyńdy josparlaı alý, ysyrapshyldyq pen astamshylyqqa, dańǵoılyq pen kerdeńdikke jol bermeý degen sóz» dep túsindiredi.
«Elbasynyń osy sózderin tolyq qoldaı otyryp, men rýhanı mádenıetiniń damýy úshin, elimizdiń ekonomıkasynyń ósýi úshin qazirgi kezde adam qundylaqtarynyń kemeldenýi men óziniń kásibı qyzmetin joǵary deńgeıde júzege asyrýy, sonymen birge, jeke tulǵanyń ulttyq baılyqty eskere otyryp ózdiginen kemeldenip damýy áser etýshi eń mańyzdy faktor dep senemin. Qazaqstandyq jastarǵa tilegim Elbasy N.Á. Nazarbaevtyń elimizdiń álemdegi eń damyǵan 30 eldiń qataryna qosylýyna baǵyt beretin sózderine qulaq asyp, jumyla qyzmet eteıik», - dep túıindedi D. Nóketaeva.
