Nokaýtshy Ahmedovtiń promoýteri aldaǵy maqsattar týraly aıtty

ASTANA. QazAqparat - Kanadanyń Eye of the Tiger Management kompanııasynyń vıtse-prezıdenti Kamıll Estefan 20 jastaǵy qazaqstandyq boksshy Sadrıddın Ahmedovtiń (6-0, 6 KO) aldaǵy jekpe-jegi jaıynda aıtyp berdi, dep habarlaıdy QazAqparat Sports.kz-ke silteme jasap.

Jerlesimiz kelesi aıqasyn 26 qańtar kúni Kvebekte (Kanada) ótkizedi. Onyń qarsylasy - «Pıtbýl» laqap atymen tanymal 22 jastaǵy meksıkalyq Abraham Hýares (13-1, 4 KO). 10 raýndqa shaqtalǵan jekpe-jekke jastar arasynda birinshi orta salmaqtaǵy WBC tujyrymy boıynsha álem chempıony ataǵy tigilgen.

«Sadrıddınmen alǵash ret kezdeskendegi aıtqany esimde. Ol maǵan: «Floıd Meıvezer, Mennı Pakıao sııaqty boksshylardy jeńip, tarıhta qalǵym keledi. Men olardyń nátıjesin basyp ozamyn», - degen edi. Biz oǵan, ol bizge senedi. Jigitterdiń damýy úshin sapaly qarsylastardy tańdaýymyz qajet. WBC tıtýlyna talasý úshin myqty qarsylasty tańdaýymyzǵa týra keldi. Bul Sadrıddın úshin qıyn synaq. Ol Mark Remsı jáne onyń bapkerlerimen jaqsy daıyndyq ótkizdi. Ahmedov osy aıqasqa dene daıarlyǵy boıynsha jańa bapkermen jumys istedi. Ol jekpe-jekke barynsha daıyn bolady», - dedi Estefan GR8 Fight North podkasyna bergen suhbatynda.