«Nogý svelo!» tobynyń solısi qazaqsha án aıtpaq
ALMATY. QazAqparat - «Nogý svelo!» tobynyń negizin qalaýshy, solıst Maksım Pokrovskıı qazaqsha án aıtpaq, dep habarlaıdy QazAqparat tilshisi.
Ol Qazaqstannyń jas ánshileri «AVESTA» tobymen óner kórsetedi. Óner ujymynyń prodıýseri Jámshıd Qarınniń aıtýynsha, ánniń mýzykasyn Maksım Pokrovskıı jazsa, sózi - Shadııar Esenálıdiki.
«Qazir Maksım qazaq tilin úırenip jatyr. Kelesi joly Almatyǵa kelgende jigittermen án jazyp ketedi. Jospar boıynsha beınebaıan telearnalarǵa shyǵady. Kompozıtsııa Pokrovskıı formatynda kóńildi, bıleýge arnalǵan. Qazaqstandyqtarǵa unaıtyn stılde án jazý týraly ótinishti ózi aıtty. Toı ánderin tyńdady. Menińshe eksperıment sátti ótti. Bul tek rok emes, halyqqa túsinikti án bolmaq», - dedi J.Qarın.
Án avtory óz jobasy týraly aıtyp berdi.
«Biz Jámshıd ekeýmiz 10 jyldan beri ajyramas dospyz. Qazaqsha án jazý burynnan kókeıdegi ıdeıa bop tur. Osy jumysty abyroıly aıaqtaı alamyn ba, ol ózinshe bólek suraq. Men tipti kontsert kezinde alańdaıtyn adammyn. Al bul jerde jańa adamdar, jańa orta, sondyqtan, óte alańdaýlymyn»,- dedi Maksım Pokrovskıı.
Qazir mýzykant AQSh-ta turady. Buryn ol qazaq ánshisi Asemmen dýet jazǵan bolatyn. Orys tilindegi beınebaıannyń túsirilim jumystary Syzǵanov atyndaǵy ulttyq hırýrgııa ortalyǵynda ótti.
