Noǵaı sýretshisi Qyzylordada «Qorqyt dalasy» kórmesin usyndy
QYZYLORDA. QazAqparat - Qyzylorda qalasyndaǵy kórkemsýret galereıasynda týysqan noǵaı halqynyń jas grafık sýretshisi Álibek Qoılaqaevtyń «Qorqyt dalasy» atty kórmesi 10 kún boıy Syr óńiri turǵyndary nazaryna usynylady, dep habarlaıdy QazAqparat tilshisi.
Kórme 14-24 maýsym aralyǵynda ótkiziledi. Sondaı-aq, Á. Qoılaqaev galereıa stýdııasynda jergilikti jas sýretshilerine sheberlik dárisin júrgizedi. Bul shara Elbasynyń «Bolashaqqa baǵdar: rýhanı jańǵyrý» baǵdarlamasy aıasynda qolǵa alynyp otyr.
Álibek Baımuratuly Qoılaqaev 1982 jyly Reseıdiń Daǵystan Respýblıkasy aımaǵyndaǵy Tereklı-Mekteb aımaǵyna qarasty Noǵaı aýdanynda dúnıege kelgen. Óziniń aıtýynsha, ol sýret salý ónerin 3-4 jasynan bastaǵan eken. Qylqalam sheberi Daǵystannyń Mahachhala qalasyndaǵy kórkem sýret ýchılışesi men Krasnodar memlekettik mádenıet jáne óner ýnıversıtetinde bilim aldy.
«Syr óńiri - túbi bir túrki halqy úshin kıeli meken. Túrki jurtynyń ortaq abyzy - Qorqyt ata máńgilik mekenin tapqan qasterli topyraq qashanda bizder úshin joǵary baǵalanady. Men osyndaı tarıhı aımaqqa qadam basyp, sizdermen júzdesip otyrǵanyma óte qýanyshtymyn. Osy saparymda Qorqyt ata keshenine arnaıy bardym. Odan alǵan áserimdi sózben jetkizý múmkin emes. Erekshe tolqynysta boldym. Ózderińiz de baıqaǵan shyǵarsyzdar, meniń shyǵarmashylyq jolymdaǵy negizgi taqyrybym - túrki álemi. Búgingi kórme taqyryby da soǵan sáıkes. Qorqyt atadan bastap Edil patsha, Tomırıs hanshaıym, Edige batyr, Shyńǵys han sekildi kóptegen sýretterdi jaryqqa shyǵardym. Bul - meniń janyma óte jaqyn. Sondyqtan osy baǵytta únemi izdeniste júremin. Árbir ult óziniń túp-tórkinine úńilýge tyrysady, Biz qazaq halqymen óte jaqyn, týys ekenimizdi bilemiz. Sol sebepti baýyrlas qazaqpen etene jaqyn aralasýǵa nıet tanytamyz. Jalpy, noǵaıdyń jalpy sany 110 myńǵa jýyq. Olardyń 103 myńǵa jýyǵy Reseıde turady. Túbi bir túrki jurtynyń tarıhy men tulǵalaryn qylqalam ushynda sóıletýge árdaıym asyqpyn», - dedi Á.Qoılaqaev QazAqparat tilshisine bergen suhbatynda.
Óziniń aıtýynsha, ýnıversıtet qabyrǵasynda júrgende «Noǵaı dalasy» taqyrybynda dıplomdyq jumys qorǵaǵan. Ol óz týyndylaryn qaýyrsyn jáne týşpen salady.
Kórmeniń ashylý saltanatynda oblys ákiminiń orynbasary Rýslan Rústemov «Biz Álibek baýyrymyzdyń týyndylaryn tamashalaı otyryp, qanshama izdenisti baıqaımyz. Grafıka óneri - ońaı sala emes. Oǵan ushqyr qııal, tereń bilim qajet ekeni belgili. Biz Álibektiń týyndylarynan sondaı erekshe kórinisterdi kórip otyrmyz», - dedi.
Álibek Qoılaqaev grafıka ónerimen qatar sándi kıimderdiń dızaıneri, kitap ıllıýstratory bolyp eńbek etedi. Onyń bul dúnıeleri de joǵary suranysqa ıe.
