Noǵaev Kaspııden zańsyz aýlanǵan balyqtyń qaıda satylatynyn aıtty
ASTANA. QazAqparat - Kaspıı teńizinen zańsyz aýlanǵan balyqtar Reseı sýbektilerine satylýda. Bul týraly búgin Úkimettiń selektorlyq rejimdegi otyrysynda Atyraý oblysynyń ákimi Nurlan Noǵaev aıtty, dep habarlaıdy QazAqparat.
«Memlekettik organdardyń qabyldaǵan sharalarynyń nátıjesinde búginde brakonerler qalaǵa kirmeıdi. Olardyń ózderiniń zańsyz tapqan ónimderin Kaspıı teńiziniń aýmaqtyq sýlarynda Reseı Federatsııasynyń sýbektilerine ne basqa oblystarǵa jetkizip júr», - dedi ol.
Onyń aıtýynsha, Atyraý oblysynyń ákimdigi respýblıkanyń basqa oblysyndaǵy organdarmen birlesip, bazarlarda satylatyn bekire tuqymdas balyqtardyń saýdalanýyna qatań qadaǵalaý júrgizý qajet dep esepteıdi.
Brakonerlikti tyıýǵa qatysty kóptegen áńgimeler bolyp júr. Balyq aýlaýmen aınalysatyn eldi mekenderdiń turǵyndary «bizdiń basqa kún kóretin jaǵdaıymyz joq» degendi aıtyp otyr. Bul rette biz óz tarabymyzdan Janbaı selosy, Zenedın aýylynda, Kaspıı teńizinen balyq aýlaıtyn aýyldarda jyldyń basynan beri 7 jármeńke ótkizdik. «Nátıjeli jumyspen qamtý jáne jappaı kásipkerlikti damytý» baǵdarlamasy men basqa da baǵdarlamalardyń aıasynda sol eldi mekenderdiń jumyssyz turǵyndaryn jumysqa tartý sharalaryn qabyldadyq. Qorytyndysynda 364 adamnyń 119-y turaqty jumysqa ornalasty. Aıta ketý kerek, brakonerlikpen aınalysatyn azamattardyń mamandyǵy joq. Biz olarǵa birinshi mamandyq berý máselesimen aınalysyp jatyrmyz», - dedi Nurlan Noǵaev.
