Noǵaev atyraýlyqtardy Astana kúnimen quttyqtady

ASTANA. QazAqparat - Búgin Atyraýda Astana kúnine oraı uıymdastyrylǵan saltanatty shara ótti, dep habarlaıdy ákimniń baspasóz qyzmeti.

Saltanatty keshti oblys ákimi Nurlan Noǵaev ashyp, barsha atyraýlyqtardy atalmysh meırammen quttyqtady. Aımaq basshysy Elbasy Nursultan Ábishulynyń bas qalanyń Astanaǵa kóshirilgeninen onyń aıaǵyna tik turyp, damýyna deıingi eńbegin tilge tıek etti.  Ol, sonymen qatar, Elordanyń Qazaqstannyń ár saladaǵy jetistikteriniń sımvolyna aınalyp otyrǵanyn aıtty.

Saltanatty sharada aımaq ekonomıkasyn damytýdaǵy jáne memlekettik saıasatty júzege asyrýdaǵy eleýli eńbegi úshin birqatar kásiporyn basshylary, dárigerler men memlekettik qyzmetshiler oblys ákiminiń alǵys hatymen marapattaldy.

Jıyn jergilikti jáne respýblıkaǵa tanymal óner sheberleriniń kontsertimen jalǵasty.