Noǵaev Atyraý óńiriniń ekonomıkalyq damý kórsetkishterin jarııa etti
NUR-SULTAN-ATYRAÝ. QazAqparat - 2019 jyldyń 9 aıynda Atyraý oblysynda negizgi kapıtalǵan salynǵan ınvestıtsııa kólemi 9,8 paıyzǵa ósti. Bul týraly búgin Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Nurlan Noǵaev aıtty, dep habarlaıdy QazAqparat tilshisi.
«9 aıdyń qorytyndysy boıynsha jalpy óńirlik ónim kólemi 106,3 paıyzdy qurady. Jan basyna shaqqanda 18 paıyzdy kórsetti. Ónerkásip ónimniń kólemi 103,7 paıyz boldy. Munaı jáne gaz óndirý kólemi de ósip kórsetip otyr. Negizgi kapıtala salynǵan ınvestıtsııalar 3 trln 179 mlrd teńgen qurap, 9,8 paıyz ósim kórsetti. Qurylys jumystarynyń kólemi 36,5 paıyzǵa jáne turǵyn úıdi paıdalanýǵa berý 16 paıyzǵa ósti. »Kásipkerlikti qoldaý« kartasy aıasynda 2015-2025 jyldary jalpy quny 3 trln 170 mlrd teńgeni quraıtyn 3 joba júzege asyp jatyr jáne osy jobalardy júzege asyrǵanda 3 889 jańa jumys oryndary ashylady», - dedi oblys basshysy.
Óńir ákiminiń aıtýynsha, birinshi besjyldyqta oblysta 28 joba iske qosyldy. Ekinshi besjyldyqta 32 jobany iske qosý josparlanǵan. Nátıjesinde 1 832 jumys orny jańadan ashylady. Indýstrııalandyrý kartasynyń aıasynda 3 iri joba iske asyrylyp jatyr. Olardyń qatarynda Atyraý munaı óńdeý zaýytyn jańǵyrtý jáne qaıta qurý, KRІ gaz-hımııa kesheniniń bar.
«Shaǵyn jáne orta kásipkerlikte jumys iste turǵan sýbektilerdiń sany 6,3 paıyzǵa artyp, 49 161 birlikti qurady jáne osy mekemelerdiń shyǵarǵan ónimderi 1trln 362 mlrd teńge boldy. 30 paıyz ósim kórsetti. Atalǵan sýbektilerde jumyspen qamtylǵandardyń sany 128 myń adamdy quraıdy. Ótken jyldyń sáıkes kezeńimen salystyrǵanda myńǵa jýyq adamǵa az. Sebebi shaǵyn jáne orta kásipkerlik sýbektileri ulǵaıyp, kóptegen mekemeler iri kásiporyn sanatyna ótti», - dedi ol.
