Nobel syılyǵynyń ıegerleri radıatsııadan qorǵaıtyn beldik oılap tapty
ASTANA. QazAqparat - Ǵalymdar radıatsııadan qorǵaıtyn beldik oılap tapty. Arnaıy jabdyqty úsh Nobel syılyǵynyń ıegerleri birlese otyryp jasaǵan, dep habarlaıdy 24 kz.
Izraıl ǵalymdary oılap tapqan antıradıatsııalyq beldik syrt pishinge qaraǵanda qarapaıym. Ol revolıýtsııalyq jabdyqqa múldem uqsamaıdy. Alaıda ıadrolyq apat kezinde onyń orny bólek. Tipti radıatsııa oshaǵynda júrgen adam ómirin de saqtap qalýy múmkin. Eń negizgi jańalyq - beldik qurylymynda. Bul jerde jabdyq jasalǵan materıal men olardyń ornalasqan orny mańyzdy. Qurastyrýshylar beldiktiń jasalý tehnologııasyn qupııada saqtaýdy jón kórip otyr. Degenmen beldik qurylymy tolyq qaýipsizdikti qamtamasyz ete almaıdy. Ol aǵzanyń eń osal jerin, birinshiden, jilik maıdy qorǵaýǵa baǵyttalǵan. Ólimge alyp keletin radıatsııa mólsherin azaıtyp, adam ómirin saqtap qala alady. Beldik adam qozǵalysyna da múldem kedergi keltirmeıdi. «Aǵzanyń dál osyndaı qorǵanysyn qamtamasyz etetin zamanaýı kostıým, kem degende, 200 keli tartýy tıis. Ony birde bir adam kıip júre almaıdy. Al biz qurastyrǵan beldiktiń salmaǵy - 15-aq keli. Ony kıgen adam esh qıyndyqsyz qozǵala alady», - deıdi Nobel syılyǵynyń ıegeri, hımık Maıkl Levıtt. Keıbir mamandar beldik tıimdiligine kúmán kelitirýde. Olar bul jabdyq qalqansha bez ben baýyrdy qorǵaı almaıtynyn aıtady. Al qurastyrýshylar beldik barlyq synaq túrinen múdirmeı ótip, atalǵan talapqa saı bolyp shyqty dep sendirýde. Jaqyn arada ǵalymdar ony dala synaqtarynda baıqap kórmek. Qazirdiń ózinde bul beldikke Japonııa men Reseı bıligi tapsyrys bergen eken.
