Nobel syılyǵynyń 120-dan astam laýreaty G7-ni klımatty qorǵaýdy kúsheıtýge úndedi
BERLIN. QazAqparat – Nobel syılyǵynyń 120-dan astam laýreaty «Úlken jetilik» tobyna kirýshi elderdiń (G7) Ulybrıtanııada ótetin aldaǵy sammıtiniń aldynda arnaıy deklaratsııaǵa qol qoıyp, onda memleket jáne úkimet basshylaryn klımattyń ózgerýimen kúreske kúsh salýǵa úndedi. Bul týraly QazAqparat DPA agenttigine silteme jasap habarlaıdy.
«Álem bıosferada qaıtymsyz ózgeristerge ushyraýy múmkin», - dep atap ótilgen deklaratsııada. Bul rette Nobel syılyǵy laýreattarynyń memleket jáne úkimet basshylaryn 2030 jylǵa qaraı parnık gazdarynyń qaldyqtaryn eki ese qysqartý boıynsha sharalardy barynsha tezirek qoldanýǵa úndep otyrǵany atap ótiledi. «Qaıtymsyz ózgeristerdiń aldyn alýǵa bolatyn ýaqyt ketip barady», - dep atap ótiledi qujatta.
Ulybrıtanııa G7 sammıtin dástúrli formatta, 11-13 maýsym kúnderi aralyǵynda Kornýoll jartylaı túbeginiń Karbıs-Beı kýrorttyq qalashyǵynda ótkizýge nıetti. G7 tobyna kirýshi elderdiń kóshbasshylarynan basqa, oǵan Eýroodaq Keńesiniń basshysy Sharl Mıshel, Eýrokomıssııa tóraıymy Ýrsýla fon der Lıaıen jáne bıyl arnaıy shaqyrylǵan Avstralııa, Ońtústik Koreıa jáne OAR basshylary, sondaı-aq DSU jańa bas dırektory Ngozı Okondjo-Iveale qatysady.
Birikken Koroldiktiń premer-mınıstri Borıs Djonson buǵan deıin bul sharanyń negizinen klımattyń ózgerýi taqyrybyna arnalatynyn málimdegen bolatyn.
