Nobel syılyǵynyń ıegeri Ramsdell júlde alǵanyn tabıǵat aıasynda júrip bildi

ASTANA.KAZINFORM — Nobel komıtetiniń hatshysy Tomas Perlman 7 qazan kúni Merı Brankov pen Shımon Sakagýchımen birge fızıologııa jáne medıtsına boıynsha Nobel syılyǵynyń laýreaty atanǵan Fred Ramsdelldiń aqyry baılanysqa shyqqanyn aıtty, dep habarlaıdy DW.  

6 qazan kúni marapat jarııalanǵan kezde amerıkalyq ǵalymnyń ınternetke kirý múmkindigi bolmaǵan.

Ramsdell áıelimen jabaıy tabıǵat aıasynda serýendep júrgen. Olar qonaqúılerine qaıtyp kele jatyp, birdeńeni jóndeýge toqtady. Áıeli uıaly telefonyn qosyp, habarlamalardy kórdi.

— Olar áli jabaıy tabıǵat aıasynda júr edi, al ol jerde aıýlar kóp. Sondyqtan áıeli shyńǵyrǵanda Ramsdell aıý kep qalǵan eken dep shoshyp ketti. Alaıda, ol Nobel syılyǵy týraly qýanyshty habardy estigen edi. Ol qýanyshtan tolqyp ketti, óıtkeni bul syılyqty múlde kútken joq, — dedi Perlman.

Buǵan deıin Ramsdelldiń áriptesi Nobel komıteti onymen baılanysa almaǵanyn, óıtkeni 64 jastaǵy laýreat órkenıetten shalǵaı, baılanys aıasynan tys jerdegi tabıǵat aıasynda ýaqyt ótkizip júrgenin aıtqan.

Stokgolmde Merı Brankovpen de birden baılanys ornatý múmkin bolmady: ol beıtanys nómirden qońyraý shalǵanda, ony spam dep eseptep, jaýap bermegen. Ol syılyq týraly úıine kelgen AP fotografynan bildi.

«Men Merıge onyń Nobel syılyǵyn alǵanyn aıtqanymda, ol „qaıdaǵyny aıtpa“ dedi, — dedi Brankovtyń kúıeýi.

Esterińizge sala keteıik, 6 qazanda fızıologııa jáne medıtsına salasyndaǵy Nobel syılyǵy ımmýnıtetti zerttegeni úshin Merı E.Brýnkov (Júıelik bıologııa ınstıtýty, Sıetl), Fred Ramsdell (Parker isik ımmýnoterapııasy ınstıtýty, San-Frantsısko) jáne Osaka ýnıversıtetiniń professory Shımon Sakagýchıge berildi.

Alaıda fızıologııa jáne medıtsına boıynsha Nobel komıteti laýreat Fred Ramsdellmen baılanysa almaǵan edi.