Nobel syılyǵynyń ıegeri Mohammadı túrmeden aýrýhanaǵa aýystyryldy
ASTANA. KAZINFORM — Beıbitshilik salasyndaǵy Nobel syılyǵyn alǵan ırandyq quqyq qorǵaýshy Nargız Mohammadı densaýlyǵy kúrt nasharlaǵan soń túrmeden aýrýhanaǵa aýystyryldy, dep habarlaıdy DW.
Iran bıligi quqyq qorǵaýshy Nargız Mohammadıdiń jaǵdaıy tez nasharlaǵandyqtan túrmeden medıtsınalyq mekemege aýystyrdy. Nargız Mohammadı qorynyń habarlaýynsha, onyń densaýlyǵyna qaýip tónip tur.
Derekkózder Mohammadı Zandjan qalasyndaǵy túrmede eki ret esinen tanyp, naýryz aıynyń sońynda júrek talmasyna ushyraǵanyn jazǵan.
Ol jýyrda ǵana únemi keýde tusynda aýyrsyný baryn aıtyp, qan qysymynyń joǵarylaýyna shaǵymdanǵan. Sonymen qatar qysqa ýaqyt ishinde aıtarlyqtaı salmaq joǵaltqan — shamamen 20 keli. Medıtsınalyq tekserý kezinde dárigerler oǵan júrýge kómektesýge májbúr boldy
Nargız Mohammadı 12 jeltoqsanda qamaýǵa alynǵannan keıin «júıeli túrde medıtsınalyq kómek kórsetilmeýine» baılanysty 140 kún ótken soń ǵana aýrýhanaǵa aýystyrylǵan.
Ol 25 jyldan astam adam quqyqtaryn qorǵaý salasyndaǵy qyzmeti úshin Iran bıligi tarapynan qýdalaýǵa ushyraǵan. Buǵan deıin birneshe ret bas bostandyǵynan aıyrylǵan, al bıylǵy jyldyń basynda sot ony qosymsha 7 jylǵa sottady.
Quqyq qorǵaýshylardyń málimetinshe, ol qamaýǵa alyný kezinde jáne túrmede bolǵan ýaqytta qatigez qarym-qatynasqa tap bolǵan.
Eske sala keteıik, Nargız Mohammadı Beıbitshilik salasyndaǵy Nobel syılyǵyn 31 jylǵa sottalyp, túrmede otyrǵan kezinde aldy.
Áıelder quqyǵy úshin jáne repressııaǵa qarsy kúresimen tanymal Nargız Mohammadı byltyr jyl sońynda 14-márte qamaýǵa alynǵan bolatyn. Ol bıyl aqpan aıynda 7 jyl 6 aıǵa bas bostandyǵynan aıyryldy.
