Nobel laýreattaryna aqsha shashýdy qoıý qajet - Qulybaev
«Astana ekonomıkalyq forýmyna Nobel laýreattaryn shaqyramyz da, tuşymdy suraq qoıa almaımyz. Shyny kerek, olardy antýraj úshin shaqyramyz. Syrttan bireýdiń bylaı-bylaı isteńder dep otyrǵany durys emes. Biz óz ishimizde naqty sheshimge kelip, baǵyt-baǵdarymyzdy belgileýimiz kerek. Urysamyz ba, daýlasamyz ba, bir sheshimge ózimiz kelýimiz kerek. Sondyqtan otandyq saraptamany qoldanǵanymyz jón. Áıtpese, ylǵı syrttan bir sıqyrshylardy kútip otyramyz. Olaı bolmaıdy», - dedi Qulybaev búgin prezıdıýmnyń keńeıtilgen otyrysynda.
Onyń aıtýynsha, Nobel laýreattary sııaqty «qymbat qonaqtardy» shaqyrǵansha ózimizdiń mamandardy konferentsııalar men semınarlarǵa jiberip, olardyń kásibı daıyndyqtaryn shyńdaǵan jón. Sonda elimizdiń ekonomıkalyq saraptamasy jetiledi. Úkimet pen bızneske durys baǵdar beriledi.
Aıta keteıik, búgingi otyrysqa Úkimet basshysy Baqytjan Saǵyntaev ta qatysty. Sol jerde Tımýr Qulybaev arzan ıpoteka naryǵyn damytý qajettigin aıtqan bolatyn .