Nobel laýreaty Djeffrı Hınton: adamzat jasandy ıntellektini baqylaýdan shyǵaryp alýy múmkin
ASTANA. KAZINFORM — Ǵylym salasyndaǵy Nobel syılyǵynyń laýreaty Djeffrı Hınton adamzattyń jasandy ıntellekti tolyq baqylaýdan shyǵaryp almaý úshin qajetti qaýipsizdik sharalaryn qabyldaýǵa bir-aq jyly qalýy múmkin ekenin málimdedi. Bul týraly Anadoly agenttigi jazdy.
Ǵalymnyń aıtýynsha, qajetti sharalar qabyldanbasa, jasandy ıntellekt adam baqylaýynan shyǵýy yqtımal.
NBC telearnasynyń habarlaýynsha, Hınton AQSh senatory, Vermont shtatynyń ókili Bernı Sanderstiń shaqyrýymen Kongress múshelerine jasandy ıntellekttiń damýy jóninde baıandama jasaǵan.
Ǵalymnyń pikirinshe, adamzat jasandy ıntellektini tolyq baqylaýdan aıyrylyp qalmaý úshin qaýipsizdik sharalaryn qabyldaýdy dál qazir bastaýy kerek. Onyń aıtýynsha, buǵan nebári bir jyldaı ýaqyt qalýy múmkin.
Buǵan deıin jasandy ıntellektten áldeqaıda aqyldy sýperıntellektiniń paıda bolýy 30–50 jyldan keıin oryn alady degen boljamdar aıtylǵan.
— Keıin bul boljamdar 10, tipti 20 jylǵa deıin qysqardy. Al qazir kóptegen adam men zertteýshi onyń paıda bolýyna birneshe jyl ǵana qalǵanyn aıtady. Bul bir jyldan keıin de bolýy múmkin, biraq odan kóp ýaqytqa sozylmaýy yqtımal, — dedi Hınton.
Ǵalymnyń aıtýynsha, jasandy ıntellekt qazirdiń ózinde «odan da jetildirilgen JI júıelerin jobalaı alatyn» deńgeıge jetti.
— Bul ózin-ózi jetildirý dep atalady. Eger biz eshqandaı shara qoldanbasaq, jaǵdaı baqylaýdan shyǵyp ketýi múmkin. Biz bul protsesti baıaýlatýymyz kerek, — dedi ol.
Jasandy ıntellekti baqylada bolýy tıis
AQSh Ókilder palatasynyń Demokratııalyq partııadan saılanǵan múshesi Ted Lıý de jasandy ıntellektiniń damýyna qatysty alańdaýshylyq bildirdi.
— Bul — ǵylymı fantastıkadaǵy stsenarııge uqsaıtyn, aqylǵa syımaıtyndaı kóringenimen, shyndyqqa óte jaqyn turǵan jaǵdaı. Eń bastysy, jasandy ıntellektini adam baqylaýy tıis. Kerisinshe bolmaýy kerek, — dedi ol.
Al senator Bernı Sanders adamzattyń bolashaǵyna jáne adamdar baqylaý jasaı almaıtyn tehnologııanyń paıda bolýyna qatysty alańdaýshylyqtyń artyp kele jatqanyn aıtty.
— Kongress músheleriniń arasynda bul máseleni shuǵyl túrde qaraý qajet degen túsinik kúsheıip keledi, — dedi Sanders.
Aıta keteıik, buǵan deıin jasandy ıntellekt «urpaǵyna» adamǵa baǵynbaýdy ósıet ete bastaǵanyn jazǵan edik.
