Nobel komıteti saıasatty beıbitshilikten joǵary qoıdy — Aq úı
ASTANA. KAZINFORM – Aq úıdiń kommýnıkatsııalar jónindegi dırektory Stıven Chýng Norvegııanyń Nobel komıtetin AQSh prezıdenti Donald Trampty beıbitshilik salasyndaǵy Nobel syılyǵynyń laýreaty retinde tańdamaǵany úshin «saıasatty beıbitshilikten joǵary qoıdy» dep aıyptady, dep habarlaıdy Kazinform agenttiginiń menshikti tilshisi.
— Prezıdent Tramp beıbit kelisimderge qol qoıýdy, soǵysty toqtatýdy jáne adamdardyń ómirin saqtap qalýdy jalǵastyra beredi. Ol — gýmanıst júrekti tulǵa, jáne onyń erik-jigeriniń kúshimen taýlardy qozǵaı alatyndaı adam eshqashan bolmaıdy. Nobel komıteti saıasatty beıbitshilikten joǵary qoıǵanyn dáleldedi, — dep jazdy Stıven Chýng áleýmettik jeli X-tegi málimdemesinde.
Tramp pen onyń odaqtastary sońǵy birneshe apta boıy prezıdenttiń bul bedeldi syılyqqa laıyq ekenin nasıhattap kelgen. Olar Tramptyń bıyl qańtarda Aq úıge oralǵannan keıin keminde jeti qaqtyǵysty retteý isindegi rólin atap ótti. Sondaı-aq ony Izraıl, Kambodja jáne Pákistan sııaqty birneshe el de qoldaǵan, dep habarlaıdy The Hill.
AQSh Kongresi Ókilder palatasynyń múshesi, Florıda shtatynyń respýblıkashyly Anna Paýlına Lýna beısenbi kúni resmı túrde Tramptyń kandıdatýrasyn Izraıl men HAMAS arasyndaǵy beıbit kelisimge qol jetkizýge qosqan úlesi úshin Nobel syılyǵyna usyndy. Ótken aıda Tramp pen Izraıl premer-mınıstri eki jylǵa sozylǵan Gaza soǵysyn toqtatýǵa baǵyttalǵan 20 tarmaqtan turatyn jospardy jarııalaǵan. Eki tarap ta kelisimniń alǵashqy kezeńderin qoldaıtyndaryn bildirdi.
Beısenbi kúni Tramp jýrnalısterdiń syılyqqa úmiti jónindegi suraqtaryna jaýap berýden bas tartty.
— Men tarıhta toǵyz aıdyń ishinde segiz áskerı qaqtyǵysty sheshken eshkimdi bilmeımin. Al men segiz qaqtyǵysty toqtattym. Mundaı buryn bolǵan emes. Olar óz isterin isteı beredi, bul qalypty jaǵdaı. Men muny marapat úshin emes, kóptegen adamnyń ómirin saqtap qalý úshin jasadym, — dedi Donald Tramp Aq úıdegi Fınlıandııa prezıdentimen kezdesý kezinde.
Buǵan deıin Nobel komıteti Venesýela saıasatkeri Marııa Korına Machadonyń beıbitshilik salasyndaǵy Nobel syılyǵynyń laýreaty atanǵanyn jarııalaǵan. Komıtet óz málimdemesinde onyń «Venesýela halqynyń demokratııalyq quqyqtaryn ilgeriletý jolyndaǵy tynymsyz eńbegin jáne dıktatýradan demokratııaǵa beıbit ári ádil ótýdi qamtamasyz etý úshin júrgizgen kúresin» atap ótti.