Nobel ınstıtýty: Laýreat týraly aqparattyń aldyn ala taralyp ketýine qatysty tekserý bastaldy

ASTANA. KAZINFORM — Nobel ınstıtýty 2025 jylǵy Beıbitshilik salasyndaǵy Nobel syılyǵynyń laýreaty týraly aqparattyń taralyp ketýine qatysty tekserý júrgizip jatyr, dep habarlaıdy Financial Times.

Oǵan oppozıtsııalyq saıasatker jáne Venesýela parlamentiniń burynǵy depýtaty Marııa Korına Machadonyń kandıdatýrasyna nátıjeniń resmı jarııalanýyna birneshe saǵat qalǵanda onlaın bástiń ádetten tys kúrt ósýi sebep boldy.

Basylymnyń málimetinshe, Polymarket platformasynda Machadonyń jeńiske jetý múmkindigi birden 3,7%-dan 31,5%-ǵa deıin kóterilip, baqylaýshylardyń kúdigin týdyrdy.

Machado esimin BAQ pen sarapshylar favorıt dep sanamaǵanymen, ol 2025 jylǵy Beıbitshilik salasy boıynsha Nobel syılyǵynyń laýreaty dep jarııalandy. Instıtýt norvegııalyq buqaralyq aqparat quralyna aqparattyń shyǵyp ketýine qatysty tergeýdi bastaǵanyn rastady.

Bıyl Beıbitshilik salasyndaǵy Nobel syılyǵyna 338 úmitker usynylǵan. Olardyń arasynda AQSh prezıdenti Donald Tramp, belsendi Greta Týnberg, Dúnıejúzilik densaýlyq saqtaý uıymy jáne BUU Bas hatshysy Antonıý Gýterrısh bar.

Marapattaý rásimi 10 jeltoqsanda, ıaǵnı Alfred Nobeldiń qaıtys bolǵan kúninde Osloda ótedi. Júlde qory 11 mıllıon shved krony (shamamen 1,17 mıllıon dollar).

Buǵan deıin Beıbitshilik salasyndaǵy Nobel syılyǵyn Tramp emes, venesýelalyq áıelge berilgeni týraly jazǵanbyz.