Nobel ınstıtýty: Beıbitshilik syılyǵyn basqa adamǵa berý múmkin emes

ASTANA. KAZINFORM – Norvegııa Nobel ınstıtýty Beıbitshilik salasyndaǵy Nobel syılyǵyn basqa tulǵaǵa berý nemese bólisý múmkin emestigin málimdedi. Túsindirme Venesýela oppozıtsııasynyń kóshbasshysy, Nobel syılyǵynyń laýreaty Marııa Korına Machado syılyqty AQSh prezıdenti Donald Trampqa bergisi keletinin aıtqannan keıin jarııalandy, dep habarlaıdy DW.

Norvegııa Nobel ınstıtýtynyń saıtynda jarııalanǵan resmı málimdemede Nobel syılyǵy laýreatynyń mártebesi ózgermeıtini naqty kórsetilgen.

– Nobel syılyǵy taǵaıyndalǵannan keıin ol keri qaıtarylmaıdy, bólinbeıdi jáne basqa tulǵalarǵa berilmeıdi. Qabyldanǵan sheshim túpkilikti bolyp sanalady jáne máńgi kúshinde qalady, – delingen ınstıtýt habarlamasynda.

Buǵan deıin Marııa Korına Machado Fox News telearnasyna bergen suhbatynda Beıbitshilik salasyndaǵy Nobel syılyǵyn Donald Trampqa bergisi keletinin nemese onymen bólisýge daıyn ekenin aıtqan. Onyń sózinshe, bul marapat «Venesýela halqynyń syılyǵy» bolyp tabylady jáne AQSh prezıdentiniń Venesýeladaǵy saıası ózgeristerge yqpal etken áreketterimen baılanysty.

– Biz bul syılyqty oǵan bergimiz keledi jáne onymen bóliskimiz keledi. Onyń jasaǵany – tarıhı qadam, bul demokratııalyq ózgeristerge bastar jol, – degen bolatyn Machado.

Nobel ınstıtýty bul pikirlerge jaýap retinde halyqaralyq erejelerge sáıkes syılyqtyń tek laýreattyń ózine tıesili ekenin jáne quqyqtyq turǵydan basqa adamǵa berilmeıtinin taǵy da naqtylady.

Aıta keteıik, Nobel syılyǵynyń laýreaty Machado Venesýeladan qaıyqpen jasyryn túrde qashyp ketti.