No Kings: dál osyndaı uranmen AQSh-ta Tramptyń saıasatyna qarsy aktsııa ótip jatyr

ASTANA. KAZINFORM – AQSh-tyń barlyq shtatynda prezıdent Donald Tramptyń saıasatyna qarsy No Kings («Patshalarǵa jol joq») atty toptyń narazylyq aktsııalary ótti, dep habarlaıdy Kazinform agenttigi shetel BAQ-taryna silteme jasap.

The Guardian basylymynyń málimetinshe, qarsylyq aktsııalary 1 qazannan beri jalǵasyp jatqan úkimet jumysyndaǵy ishinara toqtaý (shatdaýn) jáne kóshi-qon saıasatyna qarsy narazylyqtar aıasynda ótip jatyr.

Narazylyq bildirýshiler ulttyq týlar men «Patshalarǵa jol joq», «Mıllıarderler AQSh-ty qurtyp jatyr» degen jazýlary bar plakattar ustap shyqqan. Olardyń aıtýynsha, qazirgi memleket basshysynyń saıasaty eldi avtorıtarlyq basqarýǵa alyp kele jatyr.

No Kings uıymynyń resmı saıtynda jarııalanǵan málimetke sáıkes, el boıynsha 2700-den astam jerde is-shara ótkizý josparlanǵan. Uıymdastyrýshylar bul narazylyqtarǵa 1 mıllıonnan astam adam qatysady dep boljap otyr.

Al TASS agenttigi sońǵy aqparatqa súıenip, narazylyq sherýlerine shamamen 7 mıllıon adam qatysqanyn jazdy. Aktsııany uıymdastyrýshylardyń málimetinshe, amerıkalyqtar 2 700-den astam qalada kóshege shyqqan.

«Búgin AQSh tarıhyndaǵy eń iri birkúndik narazylyq sharalarynyń biri ótti — shamamen 7 mıllıon amerıkalyq jınaldy. Bul maýsym aıymen salystyrǵanda 2 mıllıon adamǵa kóp. 2 700-den astam qalada No Kings qozǵalysynyń beıbit sherýine shyqqan halyq avtorıtarızmge qarsy kúsh biriktirip, bul el patshalarǵa emes, halyqqa tıesili ekenin málimdedi», delingen resmı málimdemede.

No Kings qozǵalysynyń aldyńǵy narazylyq sharalary 14 maýsymda, Donald Tramptyń týǵan kúninde jáne Vashıngtonda ótken áskerı sherý kezinde uıymdastyrylǵan. Ol kezde AQSh qalalarynda keminde 2 100-den astam aktsııa ótip, shamamen 5 mıllıon adam qatysqan.

Eske sala keteıik, tamyz aıynda AQSh astanasynda qoǵamdyq qaýipsizdik salasynda tótenshe jaǵdaı engizilip, nátıjesinde 465 adam ustalǵan.