Nıjat Rahımov ÁCh medalin ala ala ma - Ilıa Ilınniń pikiri
ASTANA. QazAqparat - Búgin 73 kelige deıingi salmaq dárejesinde olımpıada chempıony, qazaqstandyq Nıjat Rahımov óner kórsetedi. Ol baıraqty básekege Zýlfııa Chınshanlomen jáne Ilıa Ilınmen birge daıyndaldy. Ilıa bul týrnırge qatyspaıdy. Biraq, Rahımovqa qoldaý kórsetedi, dep habarlaıdy Sports.kz.
- Ilıa, sen Nıjatty jarys jolyna alyp shyqpaqshysyń, bul seniń alǵashqy tájirıbeń be?
- Bul meniń ómirimdegi ekinshi jaǵdaı. Men 2013 jyly Vrotslavta Almas Óteshev pen Vova Sedovty jarysqa alyp shyqtym. Ol kezde bári oıdaǵydaı boldy. Biz Nıjatpen osy ýaqyt boıy jumys istedik. Onyń daıyndyǵy jaqsy boldy. Ol jas, onyń kúshi tasyp tur. Únemi alǵa umtylady. Sınergııada da birlesip jaqsy jumys atqardyq. Men onyń kásibıligine senim artamyn. Keminde bes nemese alty ret ziltemir kóterse, men úshin jaqsy kórsetkish bolar edi.
- Onyń qarsylastaryn kórdiń be?
- Iá, shamamen bilemin. Bul álem chempıonaty, bári de bolýy múmkin. Ol kásipqoı sportshy, olımpıada chempıony jáne onyń tájirıbesi mol. Sondyqtan bes ret ziltemir kóterse bolǵany, júldeniń aýyly jaqyndaı túsedi. Bul salmaqta qytaılyqtar myqty. Biraq, biz de osal emespiz, úzdik úshtikke ilinip, el qorjynyna medal salamyz dep oılaımyn.
