Nissan men Honda birigetin boldy

ASTANA. KAZINFORM – Honda Motor jáne Nissan Motor kompanııalary 2026 jyly birlesken kásiporyn bolatyny týraly baspasóz-relız taratty.

Keıin osy jańalyqqa baılanysty birlesken baspasóz konferentsııasyn da ótkizdi. Qol qoıylǵan kelisimde eki kásiporyn bıznesterin ıntegratsııalaıtyny aıtylǵan. Degenmen túpkilikti kelisim 2025 jyldyń maýsym aıynda bekitilmek. 2026 jyldyń sáýirinde qos kompanııanyń negizgi aktsıonerleri bas qosyp, birigý máselesin maquldaıdy. Al birigý protsedýrasy 2026 jyldyń tamyzynda aıaqtalý kerek.

Osy arqyly qos kásiporyn jylyna 7,5 mln kólik shyǵaryp, 20 mlrd dollar paıda tabatyn álemdegi úshinshi oryndaǵy avtoóndirýshige aınalýdy kózdep otyr.

Japondyq Honda avtokólik kompanııasy Qytaıdaǵy úsh zaýytyn ýaqytsha japqanyn jazǵan bolatynbyz.