Nissan 26 myńnan astam kóligin keri qaıtaryp jatyr
ASTANA. KAZINFORM – Nissan apat pen jaraqat alý qaýpin arttyrýy múmkin esik shekteýishteriniń nashar dánekerlenýine baılanysty 26 432 kóligin keri qaıtaryp jatyr, dep habarlaıdy FOX Business.
Japon avtoóndirýshisi bul máseleniń 2025 jylǵy Sentra jáne Altima sedandaryna, 2025-2026 jyldary shyǵarylǵan Frontier pıkaptaryna jáne 2026 jylǵy Kicks jol talǵamaıtyn kólikterine qatysty ekenin málimdedi. Bul máseleniń Nissan nemese Infiniti-diń basqa kólikterine qatysy joq.
- Keıbir Nissan kólikteri jetkizýshide óndiris kezinde durys dánekerlenbegen bir nemese birneshe esik shekteýishterimen jabdyqtalǵan bolýy múmkin. Saldarynan esik japqyshtyń sym ilmegi jetkilikti berik bolmaýy jáne keıbir jaǵdaılarda jarylyp, plastınadan ajyrap ketýi múmkin, - delingen ónimdi qaıtaryp alý týraly esepte.
Esik shekteýishi – apat bolǵan jaǵdaıda esikterdiń ashylýyna jol bermeıtin kólik quralynyń qaýipsizdik júıesiniń negizgi elementi.
Osyǵan deıin Toyota qozǵaltqyshynyń istemeı qalý qaýpine baılanysty 127 myń kólikti keri qaıtarmaq bolǵanyn jazdyq.