Nissan 2027 jylǵa qaraı óz modelderiniń 90%-yna JI-avtopılot engizedi
ASTANA. KAZINFORM – Japonııanyń Nissan Motor Co. avtokontserni bolashaq avtomobılderiniń basym bóligin jasandy ıntellekt negizindegi avtonomdy júrgizý júıesimen jabdyqtaýdy josparlap otyr. Kompanııa osylaısha satylymdy arttyryp, modeldik qataryn jańartýdy kózdeıdi, dep habarlaıdy Kyodo agenttigi.
Kompanııa málimetinshe, jasandy ıntellekt qoldanylatyn avtonomdy júrgizý tehnologııasy bolashaq modelderdiń shamamen 90 paıyzyna engiziledi. Jańa júıe alǵash ret 2027 qarjy jylynyń sońyna qaraı jańa Nissan Elgrand mınıvenine ornatylady. Bul kóliktiń satylymy 2026 jyldyń jazynda bastalady dep kútilip otyr.
Avtoóndirýshi jahandyq strategııasyn qaıta qarap, 2030 qarjy jylyna qaraı Japonııada satylym kólemin 550 myń kólikke, al AQSh pen Qytaıda árqaısysynda 1 mıllıon danaǵa jetkizýdi maqsat etip otyr.
Salystyra ketsek, 2024 jyly kompanııa Japonııada 461 myń, Soltústik Amerıkada 1,3 mıllıon, al Qytaıda 697 myń avtomobıl satqan. Al bıylǵy boljam boıynsha Japonııada bul kórsetkish 420 myńǵa, Qytaıda 653 myńǵa deıin tómendeýi múmkin.
Álsiz qarjylyq nátıjeler aıasynda Nissan model sanyn 56-dan 45-ke deıin qysqartpaq. Kompanııa suranysqa ıe ári tıimdi ónimderge basymdyq berip, ár model úshin qozǵaltqysh nusqalaryn keńeıtedi.
Kompanııanyń bas dırektory Ivan Espınosa jańa strategııa ınvestıtsııalardy ońtaılandyrýǵa, ázirleý merzimin jedeldetýge jáne naryq suranysyna ıkemdi jaýap berýge múmkindik beretinin málimdedi.
Qaıta qurylymdaý aıasynda Nissan jeti zaýytyn, onyń ishinde Kanagava prefektýrasyndaǵy Oppama kásipornyn jabýdy jáne shamamen 20 myń qyzmetkerdi qysqartýdy josparlap otyr.
Sonymen qatar kompanııa Nissan X-Trail jol talǵamaıtyn kóliginiń gıbrıd nusqasyn jáne Nissan Juke krossoveriniń elektrli modıfıkatsııasyn tanystyrdy.
Aıta keteıik, Nissan Taıaý Shyǵystaǵy kúrdeli ahýalǵa baılanysty avtokólik óndirisin qysqartatynyn málimdegen edi.
