Nysana kózdeýden qazaqstandyq mergen álem kýbogynyń qola júldegeri atandy

ASTANA. KAZINFORM — Búgin Argentına astanasy Býenos-Aıreste nysana kózdeýden ótip jatqan álem kýbogynda Qazaqstan qorjynyna alǵashqy júlde tústi.

Naqtyraq aıtsaq, áıelder arasynda vıntovkamen 50 metrden 3 pozıtsııada oq atýda Arına Altýhova qola medal jeńip aldy. Ol irikteýde 588 upaı jınap, 3-satyǵa turaqtaǵan. Al aqtyq synda 445.9 upaımen jalpy esepte 3-satyny saqtap qaldy. Altyn Úndistan, kúmis Germanııa sportshylarynyń enshisine buıyrdy.

Arına fınalda jasóspirimder, eresekter arasyndaǵy álem chempıony jáne júldegerlerinen, sondaı-aq, Olımpıadaǵa qatysqan mergenderden basym tústi.

Taǵy bir otandasymyz, Parıj Olımpıadasynyń qola júldegeri (mıkste) Aleksandra Le bul jattyǵýda 12-orynnan kórindi (584 upaı).

Sondaı-aq, Sofııa Shýljenko 14-shi (583 upaı), Elızaveta Bezrýkova 24-satydan kórindi.
Býenos-Aırestegi álem kýbogynyń kezeńi 11 sáýirde aıaqtalady.

Aıta keteıik, osyǵan deıin Argentınadaǵy álem kýbogyna qatysatyn Qazaqstan quramasy sapynda kimder el namysyn qorǵaıtynyn jazǵan bolatynbyz.