«NIS Kyzylorda Startup» jobasy iske qosyldy-Qyzylorda
QYZYLORDA. QazAqparat-Qyzylorda qalasy Nazarbaev zııatkerlik mektebinde oqýshylardyń kásipkerlik qabiletterin nyǵaıtyp, qoldaý kórsetýge baǵyttalǵan «NIS Kyzylorda Startup» jobasy iske qosyldy, dep habarlady QazAqparat HAA tilshisi mektepke silteme jasap.
«NIS Kyzylorda Startup» jobasy - 9-11 synyp oqýshylarynyń kásipkerlik daǵdylaryn damytý arqyly jas kásipkerlerdiń kásibı jáne tulǵalyq damýyna járdemdesýge, oqýshylardyń jańa bıznes-bastamalaryn qoldaýǵa arnalǵan baıqaý.
Alǵashqy kezeńde oqýshylardan barlyǵy 170-ke jýyq ótinim kelip tústi. Búgin osy ótinim bergen oqýshy toptarǵa bıznesti josparlaý, bıznes-strategııanyń mańyzdylyǵy, marketıng jasaý jáne qarjyny utymdy paıdalaný boıynsha kásibı kómek kórsetilýde.
Óńirlik kásipkerler palatasymen birlese uıymdastyrylǵan alǵashqy semınar-trenıngte oqýshylar Óńirlik isker áıelder keńesiniń tóraıymy, Qyzylorda oblystyq Kásipkerler palatasynda «Bıznes-konsýltant» jáne «Bıznes-ósý» baǵdarlamalarynyń bıznes-treneri Janna Amanovamen júzdesip, kásipkerlik týraly jalpy aqparat alyp, jańa bıznesti bastaýdyń negizgi satylarymen tanysty. Túrli oıyndardy uıymdastyrý arqyly Janna Nurlanqyzy oqýshylardy kreatıvti oılaýǵa, kedergilerge tótep bere alýǵa, kóshbasshylyq qabilettelikterdi paıdalana bilýge shaqyrdy.
Mamyr aıynda usynylǵan bıznes jobalardy irikteý kezeńi ótkiziledi. Bul kezeńde mentorlardan, jeke kásipkerlerden quralǵan konkýrstyq komıssııa eń úzdik birneshe bıznes jobalardy irikteıdi jáne aqtyq kezeńge joldama beredi.
Baıqaýdyń qorytyndy kezeńinde, ıaǵnı qazan aıynda oqýshylar óz jumystaryn qorǵap, konkýrstyq krıterılerge sáıkes úzdikter ańyqtalatyn bolady. Bıznes-ıdeıalardyń jańalyǵy jáne biregeıligi, áleýmettik jáne ekologııalyq áserleri erekshe nazarǵa alynady.
