Nıpah vırýsyna baılanysty Qazaqstanda sanıtarııalyq qaýipsizdik sharalary kúsheıdi

ASTANA. KAZINFORM – Ońtústik-Shyǵys Azııanyń birqatar elinde Nıpah vırýsyna qatysty epıdemıologııalyq ahýaldyń kúrdelenýine baılanysty QR memlekettik shekarasy arqyly ótetin barlyq ótkizý pýnktinde sanıtarııalyq-karantındik baqylaý kúsheıdi. Bul týraly Densaýlyq saqtaý mınıstrliginiń baspasóz qyzmeti habarlady.

Vedomstvo málimetinshe, atalǵan ınfektsııa boıynsha qolaısyz elderden, onyń ishinde Úndistannan keletin azamattarǵa erekshe nazar aýdarylyp otyr. Mundaı elderdiń tizimi turaqty túrde jańartylyp otyrady.

Halyqaralyq áýejaılarda qoǵamdyq densaýlyq saqtaý salasyndaǵy tótenshe jaǵdaılarǵa den qoıýǵa arnalǵan vedomstvoaralyq oqý-jattyǵýlar ótkizilip jatyr. Medıtsınalyq uıymdar joǵary daıyndyq rejımine kóshirildi.

Sondaı-aq dárilik zattardyń, jeke qorǵanys quraldarynyń jáne dezınfektsııalaý preparattarynyń jetkilikti qory qamtamasyz etilgen.

Sonymen qatar mınıstrlik vaktsınatsııa indettiń aldyn alýdyń jalǵyz tıimdi tásili bolyp qala beretinin eske saldy. Osyǵan baılanysty ata-analarǵa ulttyq kúntizbege sáıkes balalardyń profılaktıkalyq ekpeleriniń bolýyn tekserý jáne qajet bolǵan jaǵdaıda tirkelgen jeri boıynsha medıtsınalyq uıymdarǵa júginý usynylady.

Eske salaıyq, buǵan deıin Qazaqstannyń Ulttyq qoǵamdyq densaýlyq saqtaý ortalyǵy Úndistanda júrgen qazaqstandyq týrısterge Nıpah vırýsyn juqtyrý jaǵdaılarynyń tirkelýine baılanysty arnaıy usynymdar jarııalaǵan bolatyn.