NinetyOne nege toıǵa barmaıdy
ALMATY. QazAqparat - Almatyda NinetyOne tobynyń bıografııalyq fılminiń premerasy ótti. Ózgelerden erekshelenip turatyn top músheleri ózderiniń aıryqsha shyǵarmashylyǵy men sahnalyq obrazdary týraly aıtyp berdi, dep habarlaıdy QazAqparat tilshisi.
2 jyl buryn paıda bolǵan top estradada biraz daý týǵyzdy. Qala berdi tyńdarman arasynda da jik paıda boldy. Bireýler boıanyp, shashyn boıap alǵan jigitterdi «qyzteke» dese, bireýler zamanaýı, óz dara jolyn salǵysy kelgen ánshiler dep baǵalady.
Toptyń alǵashqy gastroldik sapary sátsiz boldy. Qazaqstannyń 16 óńiriniń 9-ynda kontsertin boldyrmaı tastady. 4 ánshi men prodıýserge qarsy kampanııa paıda boldy.
Kórermenderdiń kópshiligi beti men shashyn boıap alǵan jigitterdiń «qyztekege» uqsaıtyn sahnalyq obrazyn synady.
«Jigitter jańa Q-pop nemese Qazaq-pop janrynda jumys jasap jatyr. Mýzykada pop, elektrondy mýzyka men blıýzdi biriktiredi. Bul Koreıadaǵy k-pop janryna uqsas. Biraq aıyrmashylyǵy bizdiń jigitter tek qana qazaq tilinde án aıtady. Bolashaqta bári ózgerýi múmkin. Talant pen shyǵarmashylyqta shek joq», - dedi top prodıýseri, «Orda» tobynyń múshesi Erbolat Bedelhan.
Tosqaýyl qoıýshylar kóp bolǵan soń mýzykanttarǵa úzilis alýǵa týra keldi.
Alaıda, ótken jyly olar kútpegen jerden esh boıaýsyz «Almaty Arena» sahnasynda shyqty.
Sodan beri NinetyOne tobynyń kontsertteri jalǵasyp keledi.
«Múmkin osylaı kóleńkege ketkenimiz de durys bolǵan shyǵar. Sol jarty jylda kóp án jazdyq. Shyǵarmashylyqpen aınalystyq. Qıyn boldy, biraq qazir aıaqtan turyp kelemiz. Bizdiń basty aıtpaq oıymyz másele syrtqy beınede emes, biz eshkimge úlgi bolyp jatqan joqpyz. Biraq, jastar bizdi kórip eshqashan keıin sheginbeý kerektigin túsinse eken», - dedi top múshesi ZAQ (Dýlat Muhametqalıev)
Top shyǵarmashylyǵynyń qoǵamda sonsha kereǵar pikir týǵyzatynyn top basshysy ózi de tuspaldaǵan.
«Jańa nárse týǵan kezde, eskilik joıylǵanda únemi qarsylyq bolady. Men jas kezimde Maıkl Djekson, Stıvı Ýander, Backstreetboys tobynyń shyǵarmashylyǵyn tyńdaıtynmyn. Maǵan eshkim tyıym salǵan joq. Sonda da olardyń albomyn satyp alý óte qıyn bolatyn. Qazirgi tańda Qazaqstanda stadıon jınaıtyn ártister sanaýly-aq. Men tek qana ánshi emes, kontent qalyptastyratyn ártis daıyndap jatyrmyn. Bas kezindegi maqsat sol bolatyn»,- dedi Erbolat Bedelhan.
Ujymnyń fanattary da az emes. Olar ózderin Eaglez dep ataıdy.
Pýblıkaǵa shyqqanda únemi qıqý, aıqaı-shý.
Kóbine polıtsııa qyzmetkerleriniń kómegi qajet bolady.
NinetyOne tobynyń qym-qýyt ómiri týraly fılmdi Asqar Uzabaev túsirgen. Ondaǵy eki stsenadan basqasynyń bári shynaıy bolǵan oqıǵaǵa negizdelgen. Fılm bıýdjeti 100 myń dollardan asady.
Kınokartına Qazaqstandaǵy 70 kınoteatrdyń 68-inde kórsetiledi.
«Bizdiń óz tyńdarmanymyz bar. Jazda týrǵa shyǵamyz. Bizge buryn qarsy bolǵandar endi túsinikpen qaraı bastaǵanyn ańǵaramyz. Óıtkeni, biz jasaıtyn kontent - sapaly. Sol úshin de NinetyOne toby toılarǵa barmaıdy. Ondaı jerde adam mýzyka tyńdamaıdy»,- dedi Erbolat Bedelhan.
Jaqynda top músheleriniń biriniń ata-anasy belgili ánshi Sáken Maıǵazıevke ashyq hat joldady. Óz hatynda Álııa Qadyrova ulynyń sahnalyq ımıdjinen bólek alǵan tálim-tárbıesine tıispeýdi surady.
