Ninety One tobynyń Qaraǵandy men Jezqazǵandaǵy kontsertteri ótpeıtin boldy
QARAǴANDY. QazAqparat - Qaraǵandy men Jezqazǵanda atyshýly Ninety one tobynyń kontsertteri ótpeıtin boldy, dep habarlady «QazAqparat» HAA tilshisi.
Qaraǵandydaǵy kontsert 18 qazan kúni tsırk ǵımaratynda ótýi tıis bolǵan. Top jankúıerleri belgilengen ýaqytta jınaldy, alaıda olardy kassaǵa bıletterin ótkizip, aqshalaryn qaıtaryp alýǵa jiberdi.
Resmı taratylǵan aqparattyń nusqasyna sáıkes, kontserttiń bolmaý sebebi - uıymdastyrýshylar qujatty durys resimdemegen. Memlekettik múlik departamentimen kelisimshart jasalmaǵan. Óz kezeginde uıymdastyrýshylar tehnıkalyq sebepterdi de jeleý etken.
Bul rette, ınternette Qaraǵandy ákimi Nurlan Áýbákirovtyń atyna jazylǵan hat taralǵany belgili. Ótinish avtorlary Oktıabr aýdany jastarynyń atynan júgingen. Qazaq tilinde jazylǵan hatta atalmysh top jastarǵa teris tárbıe beretindigi aıtylady. Olardyń pikirinshe, Ninety one músheleri qazaq halqynyń dástúrine, diline qarsy áreketterdi nasıhattaýda.
Jezqazǵanda 19 qazanǵa belgilengen kontsert te ótpeıtin boldy. Qala ákiminiń baspasóz qyzmetinen málim etkendeı, mádenıet bólimine ujymdyq ótinish kelip túsken.
«Kontsert 19 qazanda Dostyq úıinde ótýi tıis bolatyn. Mádenıet bólimine kontsertti ótkizbeý talabymen ótinish túsken. Oǵan 300 adam qol qoıǵan», - dep atap ótti qala ákiminiń baspasóz qyzmetinen.
Dostyq úıiniń ákimshiligi kontserttik zaldy jalǵa berýden bas tartty.
Eske salaıyq, 30 qyrkúıekte toptyń Aqtóbedegi kontserti ótpeı qalǵan bolatyn.
