Ninety One tobynyń ánshisi saılaýǵa túsip jatyr
Jastar uıymynyń habarlaýynsha, 18 qańtardan bastap «Nur Otan» partııasynyń «Jas Otan» jastar qanaty Ortalyq keńes músheleriniń onlaın saılaýyn jarııalaǵan. Keńeske elimizdiń barlyq aımaqtarynan 16 kóshbasshy 4 jylǵa taǵaıyndalady. Saılaýda usynylǵan úmitkerlerdiń biri - Dýlat Muhametqalı (ZaQ) «Ninety One» tobynyń múshesi.
«Ninety One» toby - ózindik stılimen qazaq estradasynda rezonans týdyrǵan 5 ánshiden turatyn qazaqstandyq boız-bend. Toptyń ataýy egemendik alǵan 1991 jylmen baılanysty.
Top 2015 jyly «Aıyptama» ánimen alǵash sahnaǵa shyqsa, osy ánge túsirilgen beınebaıan 20 apta boıy mýzykalyq arnalardyń úzdikter tiziminde boldy. Al keıin top «Aıyptama» atty debıýtti mını-albomyn tanystyrdy. Jarty jyldan soń «Qaıtadan» ánine túsirilgen jańa beınebaıan shyqty.
Top óner kórsetken úsh jylda «Ninety one» avtobıografııalyq fılmin jáne «Qaǵaz keme» serıalyn túsirip úlgerdi.
«Saılaýǵa keletin bolsaq, Dýlat Muhametqalı Ortalyq keńes músheliginde bolýǵa nıet bildirýi - «Jas Otan» men jalpy jastar saıasatyn kúrdeli ózgerister kútip turǵanynyń belgisi. Odan ózge, saılaýǵa úmitkerler qatarynda jas kásipkerler men ózge de mamandyq ıeleri bar. Ortalyq keńes múshelerin onlaın daýys berý jolymen tańdaýda uıymnyń maqsaty ár aımaqtan daryndy, qoǵamda ózgeris engizýge qabiletti jastardy tańdaý bolsa, uıym óz degenine jetýge jaqyn dese bolady. Aıtar oıy men naqty usynystary bar jastarǵa - «Jas Otan» árdaıym ashyq», - delingen habarlamada.
«Jas Otan» joǵary ókiletti organy - Ortalyq keńesiniń saılaýy alǵash ret ótkizilip otyr. Saılaý eki kezeńnen turady. 1-kezeńde úmitkerler tirkeýden ótedi. Al 2-kezeńde úmitkerler 9 aqpanǵa deıin #JasOtanSailau heshtegimen Instagram paraqshalarynda jarııalaǵan vıdeo joldaýyna 5 000 laık jınaýy qajet. Al áleýmettik jeli qoldanbaıtyn úmitkerler qol jınaý arqyly 500 adamnyń qoldaýyna ıe bolýy kerek. Sondaı-aq, 11-16 aqpan aralyǵynda jetkilikti qoldaý jınaǵan úmitkerlerge Telegram platformasynda onlaın daýys berý ótedi. Daýys berýge «Jas Otan» músheleri qatysa alady. 17 aqpan kúni «Jas Otan» Ortalyq keńesiniń 16 múshesi belgili bolady.
