Nımesıldi jıi qoldaný qanshalyqty qaýipti jáne ol Eýropada nege satylmaıdy
ASTANA. KAZINFORM – Qazaqstandyqtar arasynda bas aýyrsa da, tis syzdasa da Nımesıldi paıdalaný ádetke aınalǵan. Alaıda bul dáriniń baýyr men asqazanǵa tıgizer zardaby orasan ekenin eskeretinder az. Damyǵan elderdiń kóbi bul preparattan bas tartqan nemese qoldanýdy qatań shektegen.
Nege Nımesıldi 5 kúnnen artyq ishýge bolmaıdy? Onyń Eýropa men AQSh naryǵynan shektetilýine ne sebep? Bul týraly «Jibek Joly» telearnasynyń «Búgin.LIVE» baǵdarlamasynda endokrınolog Aqbaıan Marqambaeva túsindirip berdi.
Mamannyń aıtýynsha, Nımesıl – steroıdty emes qabynýǵa qarsy preparattar tobyna jatady. Onyń aýyrsynýdy basý kúshi paratsetamol men aspırınnen áldeqaıda joǵary bolǵanymen, aǵzaǵa tıgizer toksıkalyq áseri de soǵurlym aýyr.
– Kóptegen naýqastarymyz Nımesıldi sómkesine salyp júrip, ár bas aýyrǵan saıyn ishýdi ádetke aınaldyrǵan. Preparat qanǵa túsken soń 1,5–2 saǵat ishinde aýyrsynýdy basady, biraq sonymen birge asqazannyń shyryshty qabatynyń qorǵanysyn buzady. Eger gastrıti bar adam ony uzaq qoldansa, ol oıyq jara (ıazva) aýrýyna, tipti asqazannan qan ketýge ákep soqtyrady, – deıdi Aqbaıan Marqambaeva.
Dárigerdiń aıtýynsha, Nımesıldiń búırek pen baýyrǵa tıgizer zııany da ǵylymı dáleldengen. Ol búırek arqyly sýdyń shyǵýyn tejep, aǵzada isiný týdyrady jáne gıpertonııasy bar jandarda qan qysymyn kóteredi. Al baýyr jasýshalarynyń zaqymdanýy eki aptadan artyq qoldanǵan jaǵdaıda anyq baıqalady. Dál osy sebepti Eýropa elderi bul dárige saqtyqpen qaraıdy.
– Mysaly, Fınlıandııada Nımesıl qabyldaǵan 100-den astam naýqasta baýyrdyń aýyr zaqymdanýy men qan ketý jaǵdaılary tirkelgen soń, bul dárini satýǵa múldem tyıym salynǵan. Al AQSh pen Kanadada bul preparat memlekettik baqylaý mekemelerinen ruqsat ala almaǵandyqtan, múlde tirkelmegen. Bizde de zań boıynsha bul dári tek retseptpen bosatylýy tıis, biraq dárihanalardyń zańsyz retseptsiz satýy halyqtyń densaýlyǵyna qaýip tóndirip tur, – dep atap ótti endokrınolog.
Dáriger Nımesıldi 12 jasqa tolmaǵan balalarǵa, júkti jáne bala emizetin áıelderge múldem qoldanýǵa bolmaıtynyn eskertedi. Preparatty qoldanýdyń eń joǵarǵy merzimi 3-5 kún, al táýliktik mólsheri 100 mg-nan eki ret qana.
Sonymen qatar elde úndistandyq dárini paıdalanýǵa tyıym salynǵanyn jazǵan edik.