Nıkosııa Eýropanyń 2026 jylǵy eń úzdik mádenı baǵyty dep tanyldy
ASTANA. KAZINFORM — Kıpr astanasy Nıkosııa 2026 jylǵa arnalǵan Eýropanyń eń úzdik týrıstik baǵyttary reıtınginde birinshi orynǵa ıe boldy, dep habarlaıdy euronews.
Nıkosııa týrızm keńesi (ETAP) qalanyń 2026 jylǵy Eýropanyń eń úzdik týrıstik baǵyttary reıtınginde Eýropanyń eń úzdik mádenı astanasy retinde kósh bastaǵanyn habarlady.
Sarapshylardyń sheshimi kópdeńgeıli baǵalaýǵa negizdelgen. Baǵalaý barysynda sandyq derekter, mádenıet salasyndaǵy jýrnalıster men týrıstik BAQ ókilderiniń pikirleri, sondaı-aq 130-dan astam elden kelgen myńdaǵan saıahatshynyń baǵasy eskerilgen.
Nıkosııa týrızm keńesiniń málimdemesinde bul joǵary mártebe Forbes jýrnalynyń baǵalaýymen de rastalǵany aıtylǵan. Basylym Nıkosııany Eýropadaǵy eń iri on mádenı qalanyń ishinde birinshi orynǵa qoıyp, ony 2026 jyldyń basty mádenı baǵyty dep ataǵan. Málimdemede Nıkosııanyń erekshe mádenı bolmysy bar qala ekeni, munda tarıh, zamanaýı shyǵarmashylyq pen kúndelikti ómir úılesim tapqany atap ótiledi. Qala ótkendi saqtap qana qoımaı, ony shyǵarmashylyq turǵyda qaıta jańǵyrtyp keledi.
ETAP dereginshe, bul jetistik Kıpr astanasynyń mýnıtsıpalıteti jáne European Best Destinations uıymymen tyǵyz áriptestikte júzege asyrylǵan maqsatty strategııalyq bastamalar men júıeli jumystyń nátıjesi sanalady.
— Nıkosııanyń 2026 jylǵa arnalǵan Eýropanyń eń úzdik mádenı astanasy retinde tanylýy «qalanyń halyqaralyq bedelin aıtarlyqtaı kúsheıtedi, onyń mádenıet, shyǵarmashylyq jáne turaqty qalalyq týrızm salalaryndaǵy áleýetin dáleldeıdi ári halyqaralyq deńgeıde ilgeriletý men yntymaqtastyq úshin jańa múmkindikter ashady», — dep qorytyndylady Nıkosııanyń mádenı týrızm basqarmasy.
Budan buryn bıyl Kıpr Eýropalyq Keńeske tóraǵalyq etýge kiriskenin jazǵan edik.