Nıkolıa Sarkozı úsh jylǵa bas bostandyǵynan aıyryldy

PARIJ. QazAqparat – Frantsııa soty eldiń burynǵy prezıdenti Nıkolıa Sarkozıdi sybaılas jemqorlyqqa jáne sýdıaǵa para berýge áreket jasaǵany úshin kináli dep tapty. Oǵan úsh jylǵa bas bostandyǵynan aıyrý jazasy kesildi, biraq onyń ekeýin shartty túrde óteıtin boldy, dep habarlaıdy QazAqparat VVS-ge silteme jasap.

Sarkozı aıyptaýlardy joqqa shyǵardy jáne bul «saıası opponentterdiń qýdalaýy» dep sanaıdy.

Osy ýaqytqa deıin Frantsııa prezıdentteriniń bireýi ǵana ókilettigi aıaqtalǵannan keıin bir ret sottaldy, biraq onyń ózinde ol túrmede otyrǵan emes.

Tergeýshiler aldymen - 2007 jáne 2012 jyldardaǵy eki saılaý naýqanyn qarjylandyrýdy muqııat tekserdi. Sarkozıge qarsy basqa da aıyptar taǵyldy, olar: sybaılas jemqorlyq jáne qyzmet babyn asyra paıdalaný.

Aıyptaý Sarkozı men onyń advokaty Tıerrı Erzogtyń telefon arqyly sóılesken jazbalaryna negizdelgen, ol eks-prezıdentpen birge aıyptaldy.

Sot isiniń tizbegi munymen bitpeıdi. Jańa sot protsesi naýryzǵa josparlanǵan, onda Sarkozı men onyń 13 seriktesi 2012 jylǵy saılaý naýqanyn zańsyz qarjylandyrdy degen aıyptaýǵa jaýap berýi kerek.

Sarkozı alaıaqtyqqa qatysy bar dep kúdikke ilinýde, ol saılaý naýqany shyǵyndaryn zańmen belgilengen lımıtinen eki ese asyrǵan dep aıyptalýda.