Nıkolaı Koster-Valdaý Mańǵystaýǵa barǵysy keletinin aıtty
ASTANA. KAZINFORM — Comic Con Astana 2026 festıvaline qatysý úshin Astanaǵa kelgen danııalyq akter Nıkolaı Koster-Valdaý Qazaqstanǵa qaıta oralyp, Mańǵystaýdy kórgisi keletinin aıtty.
Bul týraly akter Comic Con Astana 2026 aıasynda ótken baspasóz májilisinde aıtyp berdi.
Onyń sózinshe, Qazaqstanda bolǵan az ýaqyttyń ózinde jergilikti halyqtyń qonaqjaılyǵy men aqjarqyn kóńili erekshe áser qaldyrǵan.
— Meni qarsy alǵan uıymdastyrýshylar da, osynda jolyqqan adamdar da óte keremet eken. Osy sapardan keıin Qazaqstanǵa mindetti túrde taǵy kelýim kerek dep oılap otyrmyn. Ásirese, Mańǵystaýǵa barǵym keledi, — dedi Nıkolaı Koster-Valdaý.
Sondaı aq akter Astananyń ózi kútkennen áldeqaıda zamanaýı qala ekenin aıtyp, Qazaqstan týraly alǵashqy áseriniń óte jaqsy bolǵanyn jetkizdi.
— Astananyń osynshalyqty keremet qala ekenin bilmeppin, — dedi ol.
Sondaı-aq ol eldi eń aldymen adamdardyń qonaqjaılyǵy arqyly tanyǵanyn jáne qazaqtyń ulttyq taǵamdary erekshe unaǵanyn atap ótti.
Aıta keteıik, búgin elordada Comic Con Astana 2026 festıvali bastaldy.
Buǵan deıin Comic Con Astana 2026 festıvaliniń qonaǵy, danııalyq akter Nıkolaı Koster-Valdaý Qazaqstanǵa alǵashqy sapary jaıly áńgimelegen edi.
