Nıkolaı Dychko: Demalys kúnderi mindetti túrde dombyra shertemin
PAVLODAR. QazAqparat - Óńirlik kommýnıkatsııalar qyzmetinde «Rýhanı jańǵyrý» baǵdarlamasyn júzege asyrý» taqyrybynda ótken baspasóz máslıhatynda Aqsý qalasynyń ákimi Nıkolaı Dychko dombyrada oınaýdy qalaı meńgergeni týraly aıtyp berdi, dep habarlaıdy pavlodarnews.kz.
Eske sala keteıik, Ulttyq dombyra kúni aqsýlyq ákim Qurmanǵazynyń asyl muralarynyń biri - «Balbyraýyn» kúıin kásibı dombyrashymen birge oryndaǵan bolatyn. - Dombyra oınaýdy úırenip aldym dep aıtý asyra siltegendik bolar, - deıdi Nıkolaı Dychko. - Biraq ta ulttyq aspapty keńinen nasıhattaý maqsatynda men de óz kúshimdi synap kórdim. Bul alǵashqy qadam dep aıtsaq bolady. Qazaqtyń ulttyq aspabynda oınaý qyzyqty ári adamdy baýrap alady. Ol úshin ýaqyt kerek. Sondyqtan odan ári qaraı jetildirý úshin jalǵastyrýǵa tyrysamyn. Dombyra - qazaqtyń rýhy. Kásibı dırıjer Samal Temirbekovanyń jetekshiligimen ulttyq aspaptar orkestri mektep jasyna deıingi balalarǵa dombyrada oınaýdy úıretedi. Aldaǵy ýaqytta balalar dombyra orkestrin qurý josparda bar».
Aqsýlyq ákim senbi-jeksenbi kúnderi mindetti túrde jáne jumys kúnderi eki ret saǵat toǵyzdan onǵa deıin qazaqtyń qos ishekti aspabynda oınaýǵa ýaqyt tabatynyn aıtady.
Budan basqa, spıker «Ana tili» ortalyǵynyń jetekshisi Sholpan Kınjıkovanyń kómegimen memlekettik tilde dıktant jazýdy úırenip júrgenine biraz ýaqyt ótkenin atap ótti. - Burynda orys tilinde dıktantty nashar jazatynmyn, - dep eske aldy ákim. - Nege ekenin bilmeımin, alaıda aýyz eki sóıleýge qaraǵanda qazaq tilinde dıktantty jaqsy tapsyramyn. Ol jerde baǵa qoıylmady. Qatysýshylardyń arasynda memlekettik tilde úzdik jazǵandar boldy. Men sol ortasha deńgeıde tapsyrǵan tárizdimin".
