Nıkolas Madýro Nıý-Iork túrmesinen túsirilgen sýrettermen bólisti
ASTANA. KAZINFORM — Venesýelanyń bılikten qýylǵan kóshbasshysy Nıkolas Madýro áleýmettik jelilerde Nıý-Iork túrmesinen túsirilgen sýrettermen bólisip, «aıaǵyna nyq turǵanyn» málimdedi, dep habarlaıdy CBS News.
Madýro men onyń zaıyby Sılııa Flores qańtar aıynda AQSh-tyń áskerı operatsııasy kezinde Karakasta ustaldy. Olar Nıý-Iorktegi Brýklın túrmesinde esirtkiniń zańsyz aınalymy men atys qarýyn saqtaǵany úshin ustalyp otyr, biraq olar bul aıyptaýlardy joqqa shyǵardy.
— Men bul fotosýretterdi barlyq nemereme, uldarym jáne qyzdaryma, sondaı-aq bizdi jaqsy kóretin barlyq asyl adamǵa shaǵyn syılyq retinde jiberip otyrmyn, — dep jazdy Nıkolas Madýro H-te.
Pequeño regalo de amor y esperanza
— Nicolás Maduro (@NicolasMaduro) August 30, 2026
Envío estas fotos como un pequeño regalo a todos mis nietos y nietas, a los niños y niñas, y a toda la gente noble que nos ama. pic.twitter.com/Z6u3130arn
Eki fotosýrette sur tústi sporttyq kostıým kıgen Madýro qoldarymen beıbitshilik belgisin kórsetip tur. Ol tutqyndalǵannan beri salmaǵyn joǵaltqan sııaqty.
— Biz sózimizge berik ekenimizdi, júregimiz sizdiń mahabbatyńyzǵa toly ekenin bilgenińizdi qalaımyn. Árbir sózińiz, árbir áreket, árbir batańyz úshin sheksiz alǵys, — dep qosty bılikten ketken Venesýela prezıdenti.
Fotosýretter jeksenbi kúni paıda bolǵanymen, taspa derekteri olardyń 25 maýsymda túsirilgenin kórsetip otyr.
Nıý-Iorkte Madýro men onyń zaıybynyń soty 2027 jyldyń 1 maýsymynda bastalady. Ekeýi de kinásin moıyndaǵan joq. Eger alqabıler olardyń AQSh-qa kokaındi zańsyz tasymaldaýǵa qatysy bar ekenin anyqtasa, olar ómir boıy bas bostandyǵynan aıyrylýy múmkin.
Osyǵan deıin Tramp AQSh pen Venesýela arasynda «tarıhı» munaı kelisimi jasalǵanyn málimdedi.
