Nıkolas Keıdjden keıin árbir qonaǵymyzǵa tek shapan ǵana jabamyn - mınıstr Abaev

ASTANA. QazAqparat - Búgin Úkimette ótken baspasóz máslıhatynda QR Aqparat jáne kommýnıkatsııalar mınıstri Dáýren Abaev shapan kıgen Nıkolas Keıdjdiń kúlkili fotokollajdaryna qatysty óz pikirin bildirdi, dep habarlaıdy QazAqparat tilshisi.

«Negizi, kúlkili fotolarǵa Keıdjdiń emotsııasy sebep bolǵan. Al shapan jabýdyń ózi halqymyzdyń tamasha bir dástúri bolyp sanalady. Endi, Nıkolas Keıdjdiń arqasynda osy dástúrimiz keńinen tanyldy. Men ózim oǵan rıza boldym. Endi, ózim de bizge, aqparat jáne kommýnıkatsııalar mınıstrligine kelgen árbir qonaqqa tek shapan ǵana jabatyn bolamyn», - dep atap kórsetti Dáýren Áskerbekuly. 

Aıta keteıik, jaqyndaAstanaǵa kelip ketken Gollıvýd juldyzy Nıkolas Keıdjge mınıstr Arystanbek Muhamedıuly shapan japqan bolatyn. Onyń dál osy shapanmen túsken fotosy keńinen tarap, kúlkili kollajdarǵa túrtki boldy. Barlyǵy onyń shapanyn emes, betindegi emotsııasyn kelemejge aınaldyrdy. Eki kúnniń ishinde Gollıvýd juldyzynyń memge aınalǵan fotolaryn Reseı men Ýkraınanyń buqaralyq aqparat quraldary da jarııalady.Tipti, AQSh-tyń basylymdary da basyp shyǵardy .