Nıkolas Keıdj Qazaqstanda túsirilýi múmkin fılmniń sıýjetin aıtyp berdi
ASTANA. QazAqparat - Ataqty gollıvýdtyq akter, Oskar ıegeri jáne kóptegen tanymal rólderdi somdaýshy Nıkolas Keıdj Qazaqstanda birlesken fılm túsirgisi keletinin málim etti, dep habarlaıdy QazAqparat tilshisi.
«Baspasóz máslıhaty bastalǵansha, «Qazaq handyǵy: Almas qylysh» fılminiń rejısserimen jáne prodıýserimen kezdestim jáne osy fılmdi syıǵa aldym. Endi festıvaldiń keshki ashylýyna deıin bul fılmdi kórgim kelip otyr. Men jańa oryndarǵa jáne beıtanys elderge saıahat jasaǵandy unatamyn. Osy turǵydan alǵanda, qazaq mádenıetine boılap, osyndaǵy kınojobalardyń birimen jumys istegim keledi», - dedi akter.
«Bul óte qyzyq ıdeıa, - dep jalǵastyrdy ol. - Qazaqstandaǵy kınofestıvalge shaqyrylǵan amerıkalyq akter týraly fılm túsirip kóreıik», - dedi ol.
Sonymen birge, Nıkolas Keıdj fılm túsirilimindegi alǵashqy tájirıbesi týraly baıandady. Onyń aıtýynsha, álemdik kınony baǵyndyrý ońaıǵa soqpaǵan.
«15 jasymda serıaldyń synamaly bóliginde ózimdi akter retinde synap kórdim, biraq baǵym janbady. Rejısser maǵan qarap, «Myna jigit kınoda oınaı alady» dedi. Sol sátte, ómirimniń kınomen tyǵyz baılanysty bolatynyn sezdim. Kelesi fılmderim de asa tanymal bolǵan joq, «Las-Vegastaǵy ómir» fılminen keıin ǵana mansabym kóterile bastady», - dedi ol.
Eske sala ketsek, búgin «Qazaqstan» ortalyq kontsert zalynda «Eýrazııa» kınofestıvaliniń ashylý saltanaty ótedi. Oǵan «A» sanatyndaǵy Nıkolas Keıdj, Endrıen Broýdı, Djon Malkovıch syndy tanymal álemdik juldyzdar qatysady.
Kınofestıval aıasynda kıno óneriniń álemdik juldyzdary Nıkolas Keıdj, Endrıen Broýdı, Djon Malkovıch jáne basqa da juldyzdar sheberlik sabaqtaryn ótkizetin bolady.
