Nıkol Pashınıanmen saýda-ekonomıkalyq yntymaqtastyqty keńeıtýge ýaǵdalastyq – QR Prezıdenti
«Armenııanyń Premer-mınıstri Nıkol Pashınıanmen kezdesýde saýda-ekonomıkalyq yntymaqtastyǵymyzdy keńeıtýge ýaǵdalastyq. Elderimizdiń arasynda barlyq baǵyttar boıynsha senimdi ári ashyq dıalog ornaǵan. Mádenı-gýmanıtarlyq baılanystarymyz damyp keledi», - dep jazdy Q.Toqaev Twitter-de.
Aqorda málimetine sáıkes, kezdesý barysynda ekijaqty saýda-ekonomıkalyq áriptestik pen kólik-logıstıkalyq yntymaqtastyq máseleleri talqylandy.
Qasym-Jomart Toqaev Nıkol Pashınıanǵa qonaqjaılyǵy men Joǵary Eýrazııalyq ekonomıkalyq keńes otyrysyn bıik dárejede uıymdastyrǵany úshin alǵys bildire otyryp, eki el arasynda qalyptasqan senimdi dıalogty atap ótti.
«Qazaq halqy armıan halqyn qurmetteıdi. Biz qos memleket arasyndaǵy qarym-qatynasty nyǵaıtýǵa nıettimiz. Eki eldiń ortasyndaǵy saýda-ekonomıkalyq yntymaqtastyqqa erekshe nazar aýdarýymyz kerek. Jumysty jandandyryp qana qoımaı, berik yntymaqtastyqtyń qosymsha múmkindikterin qarastyrý qajet», – dep atap ótti Qasym-Jomart Toqaev.
Nıkol Pashınıan ekonomıka salasyndaǵy Qazaqstan men Armenııanyń ózara qarym-qatynasy odan ári jandana beretinine senim bildirdi.
«Sońǵy ýaqytta bizdiń saýda-ekonomıka salasyndaǵy qarym-qatynastarymyz jańa beleske kóterildi. Biraq bizdiń áleýetimiz budan áldeqaıda joǵary dep oılaımyn. Biz osy áleýetimizdi barynsha jandandyrýǵa kúsh salýymyz kerek. Óıtkeni Eýrazııalyq ekonomıkalyq odaq bizdiń elderimiz úshin jańa múmkindikter ashyp otyr», – dedi Armenııa Premer-mınıstri.
Eske salaıyq, Qazaqstan Prezıdenti Joǵary Eýrazııalyq ekonomıkalyq keńestiń otyrysyna qatysý úshin 30 qyrkúıek kúni Erevanǵa keldi. «Memleket basshylary jıyn barysynda Eýrazııalyq ekonomıkalyq odaq aıasyndaǵy memleketaralyq yntymaqtastyqtyń ózekti máselelerin talqylaıdy. Sonymen qatar, Qazaqstan Prezıdenti birqatar ekijaqty kezdesýler ótkizýdi josparlap otyr», - dep málim etken bolatyn Prezıdenttiń baspasóz hatshysy Berik Ýálı.
Búgin, 1 qazan kúni Joǵary Eýrazııalyq ekonomıkalyq keńes alańynda Qasym-Jomart Toqaev Sıngapýr Premer-Mınıstri Lı Sıan Lýnmen, Iran Prezıdenti Hasan Rýhanımen kezdesti.
