Nıkol Pashınıan: TRIPP jobasy Armenııa ekonomıkasyna tyń serpin beredi
EREVAN. KAZINFORM — TRIPP jobasyn júze asyrý aımaqtaǵy ózara kólik baılanysyn tolyq qamtamasyz etýge múmkindik beredi. Bul týraly BUU Bas Assambleıasy aıasynda ótken Konkordııa sammıtinde Armenııanyń premer-mınıstri Nıkol Pashınıan aıtty, dep habarlaıdy Kazinform agenttiginiń Erevandaǵy menshikti tilshisi.
Ol sammıt barysynda moderatordyń suraqtaryna jaýap bere otyryp, TRIPP («Tramptyń halyqaralyq beıbitshilik pen órkendeý baǵyty») jobasyn júzege asyrýǵa baǵyttalǵan josparlarǵa toqtaldy.
— Bul bizdiń elimizdiń jańa dáýirge qadam basýyna jol ashyp, ekonomıkaǵa tyń serpin beredi. Sonymen qatar ol «Beıbitshilik qıylysy» jobasyn júzege asyrýǵa yqpal etpek, — dedi Nıkol Pashınıan.
Armenııa úkimetiniń basshysy atap ótkendeı, TRIPP halyqaralyq logıstıkany túbegeıli ózgertýi múmkin. Óıtkeni, Shyǵys pen Batysty baılanystyratyn jańa baǵyt ashylady.
— Eń aldymen, Ázerbaıjanmen temirjol qatynasy jandanady. Sondaı-aq biz Armenııa men Túrkııa arasyndaǵy shekaranyń ashylyp, ekijaqty temirjol qatynasynynyń qalpyna kelgenin kútip otyrmyz, — dedi N.Pashınıan.
Eske salsaq, 2025 jyly tamyzda Vashıngtonda ótken úshjaqty kezdesýden keıin Ázerbaıjan prezıdenti Ilham Álıev, Armenııa premer-mınıstri Nıkol Pashınıan jáne AQSh prezıdenti Donald Tramp Baký men Erevan arasyndaǵy beıbit kelisim týraly birlesken deklaratsııa qabyldady. Onyń negizgi erejeleriniń biri — Tramptyń halyqaralyq beıbitshilik pen órkendeý baǵyty (TRIPP) jobasynyń bóligi retinde Ázerbaıjannyń qurlyqtyq bóligi men Nahchyvan avtonomııalyq respýblıkasy arasynda kólik baılanysyn ornatý boldy.
Halyqaralyq qaýymdastyq TRIPP jobasyn Transkaspıı saýda dáliziniń bir baǵyty retinde baǵalap otyr. Bul — aımaq elderiniń taýar tasymaldaý joldaryn ártaraptandyrýǵa múmkindik beredi. Tıisinshe, AQSh TRIPP jobasynyń daıyndyq kezeńine 140 mln dollar ınvestıtsııa saldy.
Munymen birge taıaýda Armenııa men AQSh TRIPP jobasy aıasynda birlesken kompanııa qurýǵa nıetti ekenin jazyp edik.
