Nıkol Pashınıan men Ilham Álıev Dýblınde kelissóz júrgizdi
EREVAN. KAZINFORM — Irlandııa astanasy Dýblınde ótip jatqan Eýropalyq saıası qoǵamdastyqtyń IX sammıti aıasynda Armenııanyń premer-mınıstri Nıkol Pashınıan Ázerbaıjan prezıdenti Ilham Álıevpen kezdesti, dep habarlaıdy Kazinform agenttiginiń Erevandaǵy menshikti tilshisi.
Taraptar byltyr 8 tamyzda Vashıngtonda ótken beıbitshilik sammıtiniń qorytyndylary men sol jıynda qabyldanǵan birlesken deklaratsııany iske asyrý máselelerin talqylady. Ásirese, kelissóz barysynda olar kólik jáne tranzıttik baılanystardy damytý, ekonomıkalyq yntymaqtastyqty tereńdetý jáne shekarany delımıtatsııalaý protsesine basymdyq berdi.
Kezdesýde Nıkol Pashınıan men Ilham Álıev «Halyqaralyq beıbitshilik pen órkendeý jolyndaǵy Tramp baǵyty» (TRIPP) jobasynyń iske asyrylý barysyna da toqtaldy. Bul rette olar temirjol jáne kólik joldaryn júıeli salýdyń mańyzdylyǵyn atap ótti.
Eske salaıyq, taıaýda Armenııa premer-mınıstri Nıkol Pashınıan TRIPP jobasyn júze asyrý aımaqtaǵy ózara kólik baılanysyn tolyq qamtamasyz etýge múmkindik beretinin aıtty.
Munymen birge taıaýda Armenııa men AQSh TRIPP jobasy aıasynda birlesken kompanııa qurýǵa nıetti ekenin jazyp edik.
