Nıkol Pashınıan Qazaqstan prezıdentine kóńil aıtý jedelhatyn joldady
Armenııa premer-mınıstri Nıkol Pashınıan Qaraǵandy oblysyndaǵy Kostenko shahtasyndaǵy apattan bolǵan adam shyǵynyna baılanysty Qazaqstan Prezıdenti Qasym-Jomart Toqaevqa kóńil aıtý jedelhatyn joldady, dep habarlaıdy Kazinform Armenpress agenttigine silteme jasap.
«Qurmetti Qasym-Jomart Kemeluly, Qaraǵandy oblysyndaǵy Kostenko atyndaǵy shahtada kenshilerdiń qaza bolýyna ákep soqqan apat týraly habardy úlken kúıinishpen qabyldadym. Armıan halqynyń jáne jeke óz atymnan qaıtys bolǵandardyń týystary men jaqyndaryna kóńil aıtamyn, janashyrlyq pen qoldaýymdy bildiremin. Olarǵa shydamdylyq, kúsh pen qajyr-qaırat tileımin», - dep jazylǵan jedelhatta.
Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 jumysshy aýrýhanaǵa jetkizildi.
"ArselorMıttal Temirtaý" AQ-ǵa tıesili 8 shahtanyń jumysy ýaqytsha toqtatyldy.
Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan 13 kenshini tiri tabýǵa úmit óte az ekenin málim etti.
Mert bolǵan kenshilerdiń jeke basyn anyqtaý qıynǵa túsip jatqany aıtylýda.
Prezıdent Q.Toqaev 29 qazandy jalpyulttyq aza tutý kúni etip jarııalaıtyn Ókimge qol qoıdy.
Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
QR Úkimeti apattan qaza tapqandardyń otbasylaryna qandaı kómek kórsetiletinin jarııalady.
Apatqa baılanysty Reseı, Belarýs, Ózbekstan, Qyrǵyzstan, Frantsııa prezıdentteri men Túrkııa Syrtqy ister mınıstrligi kóńil aıtty.Prezıdent Qasym-Jomart Toqaev Qaraǵandy oblysyndaǵy qaıǵyly oqıǵaǵa oraı kóńil aıtqan barlyq shet memleketter basshylary men qazaqstandyqtarǵa rızashylyǵyn bildirdi.
Kazinform «ArselorMıttalTemirtaý» tarıhynda qandaı apattar bolǵany týraly sholý usynǵan bolatyn.
