Nıkol Pashınıan Ázerbaıjanmen beıbit kelisimge ne sebepti qol qoımaǵanyn aıtty
Armenııa mınıstrler kabıneti basshysynyń aıtýynsha, Armenııa men Ázerbaıjan taraptar arasynda senimniń joqtyǵynan beıbit kelisimge qol qoımaı otyr. Alaıda onyń sózinshe, Armenııa úkimeti bar máselelerdi sheshýge baǵyttalǵan dıplomatııalyq jáne saıası jumysty jandandyrýǵa nıetti, dep habarlaıdy Kazinfom.
Ulttyq jınalystyń kezekti sessııasynda «Armenııa Respýblıkasynyń 2024 jylǵa arnalǵan memlekettik bıýdjeti týraly» zań jobasyn talqylaý barysynda Armenııa premer-mınıstri Nıkol Pashınıan beıbit kelisimge ne sebepti qol qoımaı otyrǵanyn túsindirdi.
«Eger Ázerbaıjanmen beıbitshilik qaǵıdattary kelisilse, másele nede bolýy múmkin? Nege biz alǵa jyljymaımyz, nege beıbitshilik kelisimine qol qoımaımyz? Jalpy aıtqanda, basty sebep taraptar arasyndaǵy senimsizdikte bolyp tur. Óıtkeni biz árqashan Ázerbaıjannyń nemese Ázerbaıjan bizdiń málimdemelerimizde jáne keıbir áreketterimizde kelisimderden bas tartý jáne agressıvti áreketterdi josparlaý nıetin kóremiz. Bul beıbitshilik shartynyń mátinimen jumys isteýine keri áserin tıgizedi», — dedi Nıkol Pashınıan.
Onyń aıtýynsha, jaqyn arada taraptar taǵy birneshe negizgi máseleni naqtylaýy kerek. Birinshisi — beıbitshilik shartynyń mazmunyna qatysty yqtımal qate túsindirýlerdi eńserý mehanızmin tujyrymdaý. Ekinshisi — qaýipsizdik kepildigi.
Armenııa premer-mınıstriniń aıtýynsha, úkimet pen onyń jeke ózi osy problemalardy eńserýge baǵyttalǵan dıplomatııalyq jáne saıası jumysty jandandyrýǵa nıetti.
