Nıkol Pashınıan Armenııanyń premer-mınıstri bolyp taǵaıyndaldy
EREVAN. QazAqparat – Armenııa Prezıdenti Armen Sarkısıan Nıkol Pashınıandy eldiń premer-mınıstri etip taǵaıyndaý týraly jarlyqqa qol qoıdy. Prezıdenttiń jarlyǵy konstıtýtsııalyq talapqa negizdelgen, oǵan sáıkes respýblıka úkimetiniń basshysy bolyp parlamenttik kópshilik usynǵan kandıdat taǵaıyndalady, dep habarlaıdy QazAqparat menshikti tilshisi.
2 tamyzda kezekten tys parlament saılaýynyń qorytyndysy boıynsha qurylǵan 8-shi shaqyrylymnyń Ulttyq jıynynyń birinshi otyrysy ótip jatyr. Parlamenttik kópshilikti quraıtyn «Grajdanskıı dogovor» parlamenttik fraktsııasy premer-mınıstr kandıdatýrasyna óziniń kóshbasshysy – Nıkol Pashınıandy usyndy. Qoldanystaǵy Konstıtýtsııaǵa sáıkes, el Prezıdenti jańadan saılanǵan Ulttyq jıynnyń ókilettik merzimi bastalysymen premer-mınıstr retinde parlamenttik kópshilik usynǵan kandıdatty taǵaıyndaıdy.
«Konstıtýtsııanyń 149-babynyń 1-bóligin negizge ala otyryp, Nıkol Pashınıan premer-mınıstr bolyp taǵaıyndalsyn», - delingen Armenııa Prezıdenti jarlyǵynyń mátininde.
Eske sala keteıik, Armenııada 20 maýsymda kezekten tys parlamenttik saılaý ótti. Saılaýda «Grajdanskıı dogovor» partııasy jeńiske jetti. Qoldanystaǵy zańnamaǵa sáıkes Armenııa Mınıstrler kabıneti premer-mınıstr taǵaıyndalǵannan keıin on bes kún ishinde qurylady.
