Nıkıta Ýdalov jaǵaǵa ózi shyǵyp, aman qalǵan — týysqandary
ORAL. KAZINFORM — Mańǵystaý oblysynda oqý-jattyǵý kezinde tiri qalǵan úsh sarbazdyń biri, batysqazaqstandyq Nıkıta Ýdalovtyń týysqandary Instagram áleýmettik jelisinde málimdeme jasady.
Týysqandarynyń málimdeýinshe, Nıkıta ózin-ózi qutqarǵan.
Qaıǵyly oqıǵa kezinde ol baǵdar taba bilip, jaǵaǵa deıin jetip, aman qalǵan. Qazirgi kezde kóp adam suraq qoıyp, munyń qalaı bolǵanyn bilgisi keledi. Biraq ol ázir bárin egjeı-tegjeıli aıtyp berýge daıyn emes.
— Buǵan túsinistikpen qaraýyńyzdy ótinemiz. Nıkıta bir kúnde umytý múmkin emes jaıtty bastan keshirdi. Qazir ol eshteńeni jarııalap, suhbat bergisi kelmeıdi. Ol úshin túrli nárseni oılap taýyp, anyqtalmaǵan aqparatty taratpaýlaryńyzdy suraımyz. Bastan keshken jaǵdaıdan sensatsııa jasamańyzdar. Eń bastysy, ol esin jıdy. Úıine oralmaǵan 14 sarbazdyń otbasylaryna qaıǵyra otyryp, kóńil aıtamyz, — delingen málimdemede.
Eske sala keteıik, budan buryn Kaspııdegi qaıǵyly oqıǵa kezinde mınıstrlik tiri qalǵan úshinshi áskerı qyzmetshi týraly aıtqanyn jazǵan edik.
Sondaı-aq áskerı oqý-jattyǵý kezinde aman qalǵan bir top áskerı qyzmetshi «Erligi úshin» medalimen marapattaldy. Olardyń arasynda Nıkıta Ýdalov ta bar.
