Nıkıta Kıslıtsynnyń Qazaqstanda ustalýy: Reseı azamaty qaı elge ekstradıtsııalanady

ASTANA. QazAqparat – Bas prokýrordyń orynbasary Ulan Baıjanov Reseı azamaty Nıkıta Kıslıtsyn AQSh-tyń suraýy boıynsha Qazaqstanda ustalǵanyn rastady, dep habarlaıdy QazAqparat tilshisi.

«Bul oqıǵa jaqynda ǵana boldy. Osy rette AQSh ıýrısdıktsııasy suraý jiberdi. Málimetter bazasy men Interpol arqyly júıege tıisti belgi qoıylyp, atalǵan adam ustaldy», - dedi Ulan Baıjanov Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, endi qamaýǵa alý týraly ótinishti jibergen elge kúdiktige taǵylǵan aıyptyń mán-jaıyn túsindirtkizý úshin Qazaqstan jaǵy tıisti saýal joldaıdy.

«Sodan keıin tıisti saraptama jasap, bul quqyq buzý deregi elimizde qanshalyqty qylmys sanalatynyn taldaımyz. ıAǵnı bul is jan-jaqty zertteledi. Osydan keıin ǵana kúdiktini ekstradıtsııalaý nemese bermeý jóninde bir sheshimge kelemiz», - dep túsindirdi Bas prokýrordyń orynbasary.

Munymen qosa Ulan Baıjanov Reseı jaǵynyń da atalǵan adamdy ózderine qaıtarý týraly ótinishine pikir bildirdi.

«Eger Máskeý ony qaıtarǵysy kelse, olar da kúdiktiniń isine dálel usynýǵa tıis. Eger ol Reseı azamaty retinde óz eline barǵysy kelse, onda jan-jaqty pysyqtap, sheshim qabyldaımyz. Dál qazir qandaı sheshimge keletinimizdi ázirge aıta almaımyn», - dedi ol.

Buǵan deıin reseılik BAQ ІT salasynyń mamany Nıkıta Kıslıtsynge izdeý jarııalanǵanyn habarlaǵan edi.