Nıkaragýa FAO-dan shyǵatynyn jarııalady
Nıkaragýa bıligi BUU-nyń Azyq-túlik jáne aýyl sharýashylyǵy baǵdarlamasynan (FAO) shyǵatynyn málimdep, 2024 jylǵy jahandyq azyq-túlik qaýipsizdigi týraly FAO baıandamasynyń tujyrymdarymen kelispeýine baılanysty eldegi ókildigi men keńselerin jabýdy talap etti, dep jazady TASS.
Bul týraly Nıkaragýa Syrtqy ister mınıstri Valdrak Djentskeniń BUU-nyń atalmysh uıymynyń bas dırektoryna joldaǵan hatynda aıtylǵan.
Nıkaragýa úkimeti «Álemdegi azyq-túlik qaýipsizdigi jáne tamaqtaný jaǵdaıy – 2024» baıandamasymen tanysty delingen El 19 digital portaly jarııalaǵan qujatta.
- Biz ony obektıvtiliktiń bolmaýy, ádistemelik dáldikke saı kelmeýi, jalǵan aqparattyń qamtylýy jáne aralasýǵa baǵyttalǵan agressıvti ustanymy úshin qabyldamaımyz, – delingen hatta.
Sonymen qatar esep «qasaqana saıası maqsatta taratylǵan» dep kórsetilgen.
- FAO-nyń bul ustanymy qolaısyz, jol berýge bolmaıdy jáne qurmetsizdik bolyp tabylady. Osyǵan baılanysty biz Nıkaragýanyń bul uıymnan shyǵatynyn habarlaımyz jáne onyń eldegi ókildigi men keńselerin dereý jabýdy talap etemiz, - dep basa aıtylǵan qujatta.
Hatta sondaı-aq FAO baıandamasynda Nıkaragýa týraly jarııalanǵan aqparat pen derekter Ortalyq Amerıka eliniń mekemelerimen kelisilmegen, ruqsat etilmegen jáne Nıkaragýa Respýblıkasy úkimeti tarapynan rastalmaǵan dep kórsetilgen.
- Mundaı áreketter jalǵan qorytyndylar jasaýǵa, teris aqparat taratýǵa jáne nátıjesinde Nıkaragýa úkimeti men onyń kedeılikke qarsy kúres, adam damýy jáne azyq-túlik qaýipsizdigi salasyndaǵy saıasatyn qaralaýǵa alyp keldi, - delingen qujatta.