Nıgerııanyń ornyna Ózbekstan: Qazaqstannyń teri eksporty 200 tonnaǵa qysqardy

ASTANA. KAZINFORM — Qazaqstan sıyr terisiniń eksportyn azaıtyp, qoı terisin byltyrǵydan kóbirek syrtqa satqan. Bul týraly memlekettik kirister komıtetiniń statıstıkasynda aıtylǵan. 

Resmı statıstıkaǵa súıensek, 2025 jyldyń 9 aıynda 11,7 myń dollarǵa 428,5 tonna sıyr terisi eksporttalǵan. 2024 jyldyń dál osyndaı kezeńinde 625,2 tonna iri qara terisi syrtqa satylǵan edi.

Bıyl satylǵan sıyr terisiniń 186,1 tonnasy Ózbekstanǵa, 66 tonnasy Pákistanǵa, 176,3 tonnasy Túrkııaǵa baǵyttalǵan.

Qazaqstan úshin dástúrli naryq sanalyp kelgen Nıgerııa bıyl bizdiń elden bir de bir teri almaǵan. Al byltyrǵy 9 aıda 140,3 myń dollarǵa 326 tonna teri ımporttaǵan. Ol naryqtyń jartysynan astamyn Ózbekstan basqan. Olaı deıtinimiz, byltyr Ózbekstan Qazaqstannan teri ımporttaıtyn elderdiń resmı tiziminde bolmaǵan edi. Byltyr Nıgerııa sıyr terisiniń bir tonnasyn ortasha eseppen 430 dollarǵa satyp alsa, Ózbekstan bıyl bir tonna terini 312 dollarǵa ımporttaǵan.

Sondaı-aq, 2025 jyldyń qańtar-qyrkúıek aralyǵynda 17,6 tonna qoı terisi syrtqa shyǵarylǵan. Bir jyl burynǵy kórsetkish budan 2,7 tonnaǵa az edi. Osy 17,6 tonna qoı terisi túgeldeı Ózbekstanǵa jóneltilgen.

Jyl basyndaǵy derek boıynsha, Qazaqstan 2023 jyly 2 mln 548,5 myń dana iri qara terisi óndirip, onyń 8%-yn (208,3 myń dana) qaıta óńdegen, 13,7%-yn (349,6 myń dana) eksporttaǵan bolatyn.