Nıgerııalyq azamat elorda halqyn tazalyqqa úndep, qazaqsha blog júrgizedi
ASTANA. KAZINFORM — Áleýmettik jelide «Tazalaıyq!» esimimen tanymal nıgerııalyq azamat qazaq tilinde án shyrqap, blog túsirip júr.
Afrıkadan Qazaqstanǵa saıahattap kelip, turaqtap qalǵan Abdýl Kerim Jibek Joly arnasynyń «Búgin LIVE» baǵdarlamasyna suhbat berdi.
— Men Qazaqstanǵa birinshi týrıst retinde saıahattap kelgen edim. Osynda áıelimmen tanysyp, otaý qurdyq. Qazir balalarymyz bar. Men ánshimin, án jazamyn. Birinshi qazaqsha án aıttym, keıin tilin úırendim. Qazaqstanǵa qurmetpen qaraımyn, syılastyǵym bar. 1 jyl buryn «Bizde bári bar» degen albomym shyqty. Nege «Bizde bári bar»? Óıtkeni Qazaqstanda bári bar ǵoı, — deıdi stýdııa qonaǵy.
Ánshige qazaq tilin jetisaılyq dosy úıretipti.
— Qazaqstanǵa 2019 jyly keldim. Alǵashynda orys tilin úırengenmin. Munda meniń jaqyn dostarym bar. Men olardy týysqandarym dep aıtamyn. Bárimiz týysqandar sekildi aralasamyz. Jetisaılyq Bektur degen dosym alǵash bolyp maǵan qazaq tilin úırete bastady. Keıin ártúrli adamdarmen sóılesý arqyly úırendim. Men qazir Qońyrat bolyp úlgerdim. Al ájem — Naıman, — deıdi ol.
Abdýl Kerim áleýmettik jelidegi paraqshasynda oqyrmandaryn tazalyqqa shaqyryp, jıi vıdeo jarııalaıdy.
— Tazalyq bizdiń ómirimizge qajet. Ata-babalarymyz da densaýlyq úshin tazalyq kerek ekenin aıtady. Jáne jastarǵa da osy tárbıeni kórsetýimiz kerek. Úıdi jınaý kerek, qalany taza ustaý qajet, jalqaý bolmaý kerek. Sol kezde ómirimiz kúshti, densaýlyǵymyz myqty bolady. Bul paıdaly is. Sol úshin men osy blogty túsirip bastadym, — deıdi Abdýl Kerim.
Eske sala keteıik, birneshe kún buryn Armenııa Premer-mınıstri Nıkol Pashınıan Astanada qazaqsha án tyńdap otyrǵan beınejazbasyn áleýmettik jelidegi paraqshasynda jarııalaǵany týraly jazǵan edik.