Nıgerııada jolaýshylar qaıyǵy aýdarylyp, 25 adam qaza tapty

ASTANA. KAZINFORM — Nıgerııanyń Nıger shtatynda jolaýshylar qaıyǵy ózende aýdarylyp, 25 adam qaza tapty, dep habarlaıdy Anadolu aqparat agenttigi. 

Habarlamada jergilikti Mýnııa aýdanynyń bir top turǵynynyń Shıroro aýdanyna qaıyqpen júzip bara jatqanda sol óńirdegi ózenge batyp ketkeni aıtylady.
Aldyn ala málimet boıynsha, apattan 25 adam qaza taýyp, ondaǵan adam iz-túzsiz joǵalyp ketken.

Sheneýnikter aımaqta izdeý-qutqarý jumystarynyń jalǵasyp jatqanyn jáne qaza tapqandar sanynyń artýy múmkin ekenin aıtty.

Nıgerııada jańbyrly maýsymda ózen-kólderde sýǵa batý oqıǵalary jıi kezdesedi.

Eske sala keteıik, Nıgerııada tyrysqaq aýrýynan 13 adam qaıtys bolǵany jaıly jazǵan edik.